பஜாஜ் விற்பனை 2% உயா்வு

இந்தியாவின் முன்னணி இரண்டு மற்றும் மூன்று சக்கர வாகன நிறுவனங்களில் ஒன்றான பஜாஜ் ஆட்டோவின் மொத்த விற்பனை பிப்ரவரி மாதத்தில் 2 சதவீதம் அதிகரித்துள்ளது.

இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த பிப்ரவரி மாதத்தில் நிறுவனம் 3,52,071 வாகனங்களை சில்லறை விற்பனையாளா்களுக்கு அனுப்பியது. முந்தைய 2024-ஆம் ஆண்டின் இதே மாதத்தோடு ஒப்பிடுகையில் இது 2 சதவீதம் அதிகம். அப்போது நிறுவனத்தின் மொத்த விற்பனை 3,46,662-ஆக இருந்தது.

மதிப்பீட்டு மாதத்தில் நிறுவன இரு சக்கர வாகனங்களின் மொத்த விற்பனை 2,94,684-லிருந்து 2 சதவீதம் அதிகரித்து 2,99,418-ஆகியுள்ளது. இரு சக்கர வாகனங்களின் உள்நாட்டு மொத்த விற்பனை 14 சதவீதம் சரிந்து 1,46,138-ஆக உள்ளது. 2024 பிப்ரவரி மாதத்தில் இந்த எண்ணிக்கை 1,70,527-ஆக இருந்தது.

கடந்த ஆண்டு பிப்ரவரி மாதத்தில் 1,24,157-ஆக இருந்த நிறுவன இரு சக்கர வாகனங்களின் ஏற்றுமதி நடப்பாண்டின் அதே மாதத்தில் 23 சதவீதம் உயா்ந்து 1,53,280-ஆக உள்ளது என்று அந்த அறிக்கையில் தெரிவிக்கப்பட்டுள்ளது.