Perplexity நிறுவனத்தின் அதிரடி… செயற்கை நுண்ணறிவுடன் கூடிய வெப் பிரௌசர் அறிமுகம்!

பெர்ப்ளெக்ஸிடி (Perplexity) நிறுவனம், அதிநவீன செயற்கை நுண்ணறிவு தொழில்நுட்பத்துடன் கூடிய கோமெட் (Comet) எனும் புதிய வெப் பிரௌசரை விரைவில் அறிமுகப்படுத்தவுள்ளது. இது பிரௌசிங் அனுபவத்தை மேம்படுத்தும் ஒரு புரட்சிகரமான முயற்சியாகக் கருதப்படுகிறது. திங்களன்று, பெர்ப்ளெக்ஸிடி நிறுவனம் கோமெட் உலாவியின் அறிமுகத்தை அறிவித்தது. ஆர்வமுள்ள பயனர்கள், இந்த புதிய உலாவியை முதலில் பயன்படுத்தும் வாய்ப்பைப் பெற பதிவு செய்து கொள்ளலாம்.

பெர்ப்ளெக்ஸிடி நிறுவனத்தின் தலைமை நிர்வாக அதிகாரி அரவிந்த் ஸ்ரீனிவாஸ், LinkedIn சமூக வலைத்தளத்தில் இது குறித்து ஒரு பதிவை வெளியிட்டார். அதில், "பெர்ப்ளெக்ஸிடி நிறுவனம் கோமெட் எனும் புதிய செயற்கை நுண்ணறிவு உலாவியை விரைவில் அறிமுகப்படுத்தவுள்ளது. இணைய உலாவியின் எதிர்காலத்தை வடிவமைக்க எங்களுடன் இணையுங்கள். செயற்கை நுண்ணறிவு உங்களுக்காக ஆழமான ஆராய்ச்சி மற்றும் பணிகளை செய்யும்" எனக் குறிப்பிட்டுள்ளார்.

கோமெட் உலாவி ஸ்மார்ட்போன்களுக்கு மட்டும் வழங்கப்படுமா அல்லது விண்டோஸ், மேக் ஓஎஸ் போன்ற பல்வேறு இயக்க முறைமைகளிலும் கிடைக்குமா என்பது இன்னும் தெளிவாகத் தெரியவில்லை. இருப்பினும், கோமெட் உலாவியில் செயற்கை நுண்ணறிவு திறன்கள் மற்றும் தானியங்கி பணிகளைச் செய்யும் வசதிகள் இருக்கும் என எதிர்பார்க்கப்படுகிறது. இந்த புதிய உலாவி, ஏற்கனவே சந்தையில் உள்ள குரோம் போன்ற ஜாம்பவான்களுடனும், டியா (Dia) போன்ற புதிய செயற்கை நுண்ணறிவு உலாவிகளுடனும் போட்டியிட உள்ளது.

2022 இல் தொடங்கப்பட்ட பெர்ப்ளெக்ஸிடி நிறுவனம், செயற்கை நுண்ணறிவு டூல்களுக்கு பெயர் பெற்றது. இந்நிறுவனம் ஏற்கனவே ChatGPT மற்றும் DeepSeek போன்ற பெரிய மொழி மாதிரிகளைப் பயன்படுத்தி செயற்கை நுண்ணறிவு தேடுபொறியை உருவாக்கியுள்ளது. 

ஆண்ட்ராய்டு மற்றும் iOS சாதனங்களில் கிடைக்கும் இந்த செயலி, இணைய உலாவல் மற்றும் செயற்கை நுண்ணறிவின் சக்தியை ஒருங்கிணைத்து பயனர்களுக்கு தனித்துவமான அனுபவத்தை வழங்குகிறது. கோமெட் வருகை தொழில்நுட்ப உலகில் பெரும் எதிர்பார்ப்பை உருவாக்கியுள்ளது. இணைய உலாவியின் எதிர்காலத்தை ஆராய ஆர்வமுள்ள பயனர்கள் இதை முயற்சித்துப் பார்க்க பதிவு செய்யலாம்.