.png)
1 day ago
ARTICLE AD BOX
தொகுதி மறுசீரமைப்பு விவகாரம் தொடா்பாக கூட்டு நடவடிக்கைக் குழு அமைப்பது குறித்த திமுகவின் முன்னெடுப்புக்கு பஞ்சாப் முதல்வா் பகவந்த் மான் ஆதரவு தெரிவித்துள்ளாா்.
பாஜக வெல்லாத இடங்களில் மக்களவைத் தொகுதிகளை குறைக்க அக்கட்சித் தலைமையிலான தேசிய ஜனநாயக கூட்டணி அரசு முயற்சிப்பதாக அவா் கூறினாா்.
மக்கள்தொகை அடிப்படையில் தொகுதிகளை மறுசீரமைத்தால், அது மக்கள்தொகையை திறம்பட கட்டுப்படுத்திய மாநிலங்களைப் பாதிக்கும் என்றும், இதனால் மக்களவையில் அந்த மாநிலங்களின் பிரதிநிதித்துவம் குறையும் என்றும் தமிழக முதல்வா் மு.க.ஸ்டாலின் தெரிவித்துள்ளாா்.
இதுதொடா்பாக ஆந்திரம், கா்நாடகம், கேரளம், தெலங்கானா, ஒடிஸா, மேற்கு வங்கம், பஞ்சாப் ஆகிய 7 மாநிலங்களைச் சோ்ந்த முதல்வா்கள், முன்னாள் முதல்வா்கள், அந்த மாநிலங்களில் உள்ள பல்வேறு முக்கியக் கட்சிகளின் தலைவா்களுக்கு அழைப்பு விடுத்து முதல்வா் மு.க.ஸ்டாலின் கடிதம் எழுதினாா்.
தொகுதிகள் மறுசீரமைப்பு தொடா்பாக கூட்டு நடவடிக்கைக் குழு அமைத்து தொடா் நடவடிக்கைகள் மேற்கொள்வது குறித்த ஆலோசனைக் கூட்டம், சென்னையில் மாா்ச் 22-ஆம் தேதி நடைபெற உள்ளது.
இந்தக் கூட்டத்தில் பங்கேற்குமாறு கேரளம், கா்நாடகம், தெலங்கானா முதல்வா்கள், ஆந்திரம், ஒடிஸா மாநிலங்களின் எதிா்க்கட்சித் தலைவா்களுக்கு முதல்வா் மு.க.ஸ்டாலின் அழைப்பு விடுத்துள்ளாா். இதேபோல ஆம் ஆத்மி கட்சியைச் சோ்ந்த பஞ்சாப் முதல்வா் பகவந்த் மானுக்கும் அழைப்பு விடுக்கப்பட உள்ளது.
இதுதொடா்பாக பஞ்சாப் தலைநகா் சண்டீகரில் பகவந்த் மான் செய்தியாளா்களிடம் சனிக்கிழமை கூறுகையில், ‘தொகுதி மறுசீரமைப்பு விவகாரம் தொடா்பாக தமிழக முதல்வா் மு.க.ஸ்டாலினுடன் பேசினேன். திமுக குழுவினா் என்னைச் சந்திக்க உள்ளனா்.
தமிழ்நாட்டின் மக்கள்தொகை குறைவாக உள்ளதால், தமிழகத்தில் உள்ள மக்களவைத் தொகுதிகளை குறைக்க மத்திய அரசு விரும்புகிறது. இது மக்கள்தொகையைக் கட்டுப்படுத்துவதற்கு எதிராக மத்திய அரசு உள்ளதை சுட்டிக்காட்டுகிறது.
தொகுதி மறுசீரமைப்பு மூலம், பாஜக வெல்லாத இடங்களில் மக்களவைத் தொகுதிகளை குறைக்க அக்கட்சித் தலைமையிலான தேசிய ஜனநாயக கூட்டணி அரசு முயற்சிக்கிறது.
இந்த விவகாரம் தொடா்பாக ஆராய்வதற்கு பஞ்சாப் அரசு சாா்பில் அதிகாரிகள் பணியமா்த்தப்பட்டுள்ளனா். அவா்களின் பணியைத் தொடா்ந்து பஞ்சாபில் எவ்வளவு தொகுதிகள் கூடும் அல்லது குறையும் என்பது தெரியவரும் என்றாா்.
