தவெகவில் இணைந்தார் அதிமுக நிர்வாகி: புதிய நிர்வாகிகள் பட்டியல் அறிவிப்பு

சென்னை: ஆதவ் அர்ஜூனா, சி.டி.ஆர் நிர்மல் குமார் ஆகியோர் தவெக கட்சியில் இணைந்தனர். விசிகவில் இருந்து விலகிய ஆதவ் அர்ஜுனா, அதிமுகவில் இருந்து விலகிய சி.டி.ஆர். நிர்மல் குமார் உள்ளிட்டோர் நேற்று பனையூரில் உள்ள தவெக தலைமை அலுவலகத்தில் அக்கட்சியின் தலைவர் விஜய் முன்னிலையில் அக்கட்சியில் இணைந்தனர். இதனைத் தொடர்ந்து ஆதவ் அர்ஜுனா, நிர்மல்குமார் உள்ளிட்டோருக்கு முக்கிய பதவிகள் வழங்கப்பட்டன.

இதுகுறித்து தவெக தலைவர் விஜய் வெளியிட்ட அறிக்கை: ஆதவ் அர்ஜுனா – தேர்தல் பிரசார மேலாண்மைப் பொதுச்செயலாளர், சி.டி.ஆர். நிர்மல் குமார் – துணைப் பொதுச்செயலாளர் (தகவல் தொழில்நுட்பம் மற்றும் சமூக ஊடகப் பிரிவு), ஜெகதீஷ் – தலைமைக் கழக இணைப் பொருளாளர், ராஜ்மோகன் – கழகக் கொள்கைப் பரப்புச் செயலாளர், லயோலா மணி (எ) மணிகண்டன் – கழகக் கொள்கைப் பரப்பு இணைச் செயலாளர், பேராசிரியர் சம்பத்குமார் – கழகக் கொள்கைப் பரப்பு இணைச் செயலாளர் உள்ளிட்ட 19 நபர்களுக்கான பொறுப்பு விவரங்கள் வெளியிடப்பட்டுள்ளன.

மேற்கண்ட பொறுப்புகளில் நியமிக்கப்படுபவர்கள் அனைவரும் எனது உத்தரவு மற்றும் ஆலோசனைக்கிணங்க, கழகப் பொதுச்செயலாளர் ஆனந்த் வழிகாட்டுதலின்படி கழகப் பணிகளை மேற்கொள்வார்கள். கழகத் தோழர்களும், அனைத்து நிலை நிர்வாகிகளும் புதிய பொறுப்பாளர்களுக்கு முழு ஒத்துழைப்பை நல்கி, வரும் சட்டமன்றத் தேர்தலுக்கானக் கட்டமைப்பு மற்றும் தேர்தல் முன்னெடுப்புகளை முழுவீச்சில் மேற்கொள்ள வேண்டும் என்று கேட்டுக் கொள்கிறேன். இவ்வாறு அறிக்கையில் கூறப்பட்டு உள்ளது.

The post தவெகவில் இணைந்தார் அதிமுக நிர்வாகி: புதிய நிர்வாகிகள் பட்டியல் அறிவிப்பு appeared first on Dinakaran.