டெல்லியில் பிரபல வழக்கறிஞரை நேரில் சந்தித்த அமைச்சர் செந்தில் பாலாஜி…! என்ன காரணம்…?

டெல்லியில் பிரபல வழக்கறிஞர் முகுல் ரோத்தகியை சந்தித்து அமைச்சர் செந்தில் பாலாஜி பேசியுள்ளார்.

அமைச்சர் செந்தில் பாலாஜி துறை அமைச்சராக பொறுப்பு வகிக்கும் டாஸ்மாக் நிறுவனத்தை மையப்படுத்தி அமலாக்கத் துறை அதிகாரிகள் கடந்த மார்ச் 6-ம் தேதி முதல் மார்ச் 8-ம் தேதி வரை தொடர் சோதனையில் ஈடுபட்டனர். குறிப்பாக டாஸ்மாக் தலைமை அலுவலகம், அம்பத்தூர் தொழிற்பேட்டை, மதுபான குடோன், அமைச்சர் செந்தில் பாலாஜியின் வீடு, திமுக எம்.பி. ஜெகத்ரட்சகனுக்கு சொந்தமான மதுபான ஆலை உள்ளிட்ட 20-க்கும் மேற்பட்ட இடங்களில் நடத்தப்பட்ட சோதனையில் பல்வேறு ஆவணங்களை அதிகாரிகள் கைப்பற்றினர். இந்த சோதனையின் முடிவில் டாஸ்மாக் நிறுவனத்தில் ரூ.1,000 கோடி வரை முறைகேடுகள் நடந்திருப்பதாக அமலாக்கத்துறை தெரிவித்தது.

போக்குவரத்து தொடர்பான டெண்டர், மதுபான உரிமம், மதுபான ஆலைகள் அதிகாரிகளுக்கு வழங்கிய லஞ்சம், மதுபான டெண்டர், மதுபான கொள்முதல், ஊழியர்கள் பணிநியமனம் மற்றும் இடமாற்றம் போன்றவற்றில் வரி ஏய்ப்பு, சட்டவிரோத பணப்பரிவர்த்தனை நடைபெற்றுள்ளதாக குற்றம்சாட்டப்பட்டது. குறிப்பாக பாட்டிலுக்கு ரூ.10 முதல் ரூ. 30 வரை கூடுதலாக பணம் வசூலித்தது தொடர்பான ஆதாரங்கள் சிக்கியுள்ளதாகவும், போக்குவரத்துக்காக ஆண்டுதோறும் ரூ.100 கோடியை செலவிட்டு, கணக்கில் காட்டப்படாத கோடிக்கணக்கான தொகை மூலமாக சட்டவிரோத பணப்பரிமாற்றத்தி்ல் டாஸ்மாக் நிறுவன அதிகாரிகள் ஈடுபட்டு இருப்பதாக அமலாக்கத்துறை சார்பில் தெரிவிக்கப்பட்டது.

அமலாக்கத்துறையின் இந்த நடவடிக்கைகளுக்கு தடை கோரி டாஸ்மாக் நிறுவனம் தரப்பில் தமிழக அரசு சென்னை உயர் நீதிமன்றத்தில் வழக்கு தொடர்ந்துள்ளது. இந்த வழக்கு இன்று அல்லது நாளை விசாரணைக்கு வரலாம் என்று எதிர்பார்க்கப்படுகிறது. இந்த நிலையில் அமைச்சர் செந்தில் பாலாஜி நேற்று விமானம் மூலம் டெல்லி சென்றது அரசியல் வட்டாரத்தில் பேசும் பொருளாக மாறியது. டெல்லியில் பிரபல வழக்கறிஞர் முகுல் ரோத்தகியை அமைச்சர் செந்தில் பாலாஜி சந்தித்துள்ளார். டாஸ்மாக் ஊழல் வழக்கு தொடர்பாக பேசிய உள்ளதாக சொல்லப்பட்டது. ஆனால் செந்தில்பாலாஜி ஜாமீனில் வெளி வந்த பிறகு தனக்காக வாதாடிய தனது வழக்கறிஞர் முகுல் ரோத்தகியை சந்திக்க டெல்லி சென்றிருந்தார் எனவும் சொல்லப்படுகிறது.

The post டெல்லியில் பிரபல வழக்கறிஞரை நேரில் சந்தித்த அமைச்சர் செந்தில் பாலாஜி…! என்ன காரணம்…? appeared first on 1NEWSNATION - Tamil News Online | Latest News in Tamil | Breaking News Tamil | Tamil News Live | தமிழ் நியூஸ் | Tamilnadu News.