டெல்லி சட்டப்பேரவை தேர்தல்: ஆம் ஆத்மி தோல்விக்கான 10 காரணங்கள்! முழு விவரம்!

டெல்லி சட்டப்பேரவை தேர்தல் முடிவுகள் வெளியாகியுள்ள நிலையில், 27 ஆண்டுகளுக்கு பிறகு பாஜக ஆட்சியை பிடித்துள்ளது. அரவிந்த் கெஜ்ரிவாலின் ஆம் ஆத்மி கட்சி படுதோல்வியை சந்தித்துள்ளது. ஆம் ஆத்மி கட்சி தோல்வி அடைந்தற்கான 10 காரணங்களை பார்க்கலாம்.

1. ஆட்சியின் மீதான அதிருப்தி

10 ஆண்டுகள் ஆட்சி செய்த பிறகு, ஆம் ஆத்மி கட்சிக்கு கடும் எதிர்ப்பு எழுந்தது. முந்தைய ஆட்சிக் காலத்தில் சுகாதாரம் மற்றும் கல்வியில் சாதனைகள் புரிந்ததற்காக அக்கட்சி பாராட்டுகளைப் பெற்றாலும், காற்றின் தரம் மேம்படுத்தப்பட்டது போன்ற நிறைவேற்றப்படாத வாக்குறுதிகள் முக்கிய பிரச்சினைகளாக மாறியது.

பாஜக தலைமையிலான மத்திய அரசு தனது பணிகளைத் தடுப்பதாக ஆம் ஆத்மி கட்சி மீண்டும் மீண்டும் கூறியது வாக்காளர்களை சோர்வடையச் செய்தது. 10 ஆண்டுகள் ஆட்சியில் இருந்த பிறகு அவற்றை சாக்குப்போக்காகக் கருதினர். மூத்த ஆம் ஆத்மி தலைவர்களின் கைதுகள் உட்பட உள் குழப்பம், கட்சியின் நிலையை மேலும் பலவீனப்படுத்தியது.

2. மதுபான ஊழல் 

மதுபானக் கொள்கையில் நடந்த ஊழல் ஆம் ஆத்மி கட்சியின் தூய்மையான ஆட்சி என்ற பிம்பம் பெரும் அடியைச் சந்தித்தது. ஆம் ஆத்மி கட்சி டெல்லியை "குடிகாரர்களின் நகரமாக" மாற்றியதாகவும், மதுபான விற்பனையாளர்களிடமிருந்து லஞ்சம் பெற்றதாகவும் பாஜக குற்றம் சாட்டியது.

மதுபான கொள்கை ஊழல் வழக்கு தொடர்பாக அரவிந்த் கெஜ்ரிவால், மணீஷ் சிசோடியா மற்றும் சஞ்சய் சிங் போன்ற தலைவர்களின் கைது கட்சியின் வளர்ச்சியை தடுத்தது. இதேபோல் கெஜ்ரிவால் இல்லத்தின் ரூ.33.66 கோடி புதுப்பித்தலைக் குறிக்கும் 'ஷீஷ் மஹால்' சர்ச்சை, கெஜ்ரிவாலின் நற்பெயரை மேலும் கெடுத்தது. புதுப்பித்தல் செலவுகள் ₹7.91 கோடியாக இருந்த ஆரம்ப மதிப்பீட்டிலிருந்து பல மடங்கு அதிகரித்துள்ளதாக தலைமை கணக்குத் தணிக்கை அதிகாரியின் (CAG) அறிக்கையை பாஜக எடுத்துக்காட்டியது.

3. அரவிந்த் கெஜ்ரிவால் கைது 

மதுபான கொள்கை ஊழல் தொடர்பாக கெஜ்ரிவால் கைது செய்யப்பட்டு சிறை சென்றதும் அதிஷி முதல்வராக பொறுப்பேற்றார். இது கட்சி தலைமையில் வெற்றிடத்தை உருவாக்கியது. அதிஷிக்கு கட்சியின் மூத்த தலைவர்கள் ஒத்துழைப்பு கொடுக்கவில்லை. கட்சியில் ஒவ்வொருவரும் ஒரு முடிவுகளை எடுக்க ஆரம்பித்ததால் ஒற்றுமையின்றி குழப்பம் நிலவியது. 

4. காங்கிரசுடன் கூட்டணி இல்லை

காங்கிரசுடன் கூட்டணி இல்லாதது ஆம் ஆத்மி கட்சிக்கு பெரும் இழப்பை ஏற்படுத்தியது. காங்கிரஸ் ஆளும் கட்சி ஆம் ஆத்மிக்கு எதிராக ஒரு தீவிரமான பிரச்சாரத்தைத் தொடங்கியது.  ஆம் ஆத்மியின் ஊழல்,  நிறைவேற்றப்படாத வாக்குறுதிகள் குறித்து காங்கிரஸ் பேசியதால் மக்கள் இரண்டு கட்சிகளுக்கும் வாக்களிக்காமல் பாஜகவுக்கு வாக்களித்து விட்டனர். 

5. உள்கட்டமைப்பில் கவனம் செலுத்தவில்லை 

ஆம் ஆத்மி ஆட்சி டெல்லியின் உள்கட்டமைப்பு பிரச்சினைகளைத் தீர்க்கத் தவறியது ஒரு முக்கிய விஷயமாக மாறியது. பாழடைந்த சாலைகள், அடைபட்ட வடிகால்கள் மற்றும் ஒழுங்கற்ற குப்பை சேகரிப்பு ஆகியவை வாக்காளர்களை, குறிப்பாக நடுத்தர மற்றும் உயர் நடுத்தர வர்க்கப் பகுதிகளில் கோபப்படுத்தின. டெல்லி மாநகராட்சியை கட்டுப்படுத்திய ஆம் ஆத்மி  இந்தப் பிரச்சினைகளுக்கான பழியை பாஜக மீது சுமத்த முடியவில்லை.

6. பாஜகவின் தந்திர பிரசாரம்

பாஜக தனது கவனத்தை அதன் வழக்கமான இந்துத்துவ கொள்கைகலில் இருந்து விலக்கி, அரவிந்த் கெஜ்ரிவால் மற்றும் அவரது நிர்வாகத்தை குறிவைத்தது. ஊழல், காற்று மாசுபாடு மற்றும் போக்குவரத்து போன்ற பிரச்சினைகளை பாஜக மக்களிடம் கொண்டு சென்றது. இதேபோல் உள்ளூர் குடியிருப்பாளர் நலச் சங்கங்களுடன் இணைந்து மத்திய அரசு திட்டங்களை ஊக்குவித்தது. மேலும் பாஜக கையில் எடுத்த AIடிஜிட்டல் பிரசாரம் ஆம் ஆத்மிக்கு வினையாக மாறி விட்டது. 

7. பாஜகவின் மாஸ்டர் பிளான் 

பாஜக புது தில்லி தொகுதியில் பர்வேஷ் வர்மா போன்ற வலுவான வேட்பாளர்களை நிறுத்தியது ஜாட் சமூகம் உட்பட முக்கிய சமூக மக்களின் ஆதரவை மீண்டும் பெற பாஜகவுக்கு உதவியது. இது ஆம் ஆத்மிக்கு பெருத்த அடியை உண்டாக்கி விட்டது.

8. நகராட்சி நிர்வாகத் தவறு

டெல்லியில் நிதி முடிவுகளைக் கட்டுப்படுத்தும் MCD-யில் ஒரு நிலைக்குழுவை அமைக்கத் தவறியது, நிர்வாகத்தை மேலும் பாதித்தது. விரக்தியடைந்த கவுன்சிலர்களும் நிறைவேற்றப்படாத வாக்குறுதிகளும் வாக்காளர்களிடம் பரவலான அதிருப்திக்கு வழிவகுத்தன. 

9. மூத்த தலைவர்களின் வெளியேற்றம்

பிரசாந்த் பூஷண், யோகேந்திர யாதவ் மற்றும் குமார் விஸ்வாஸ் உள்ளிட்ட பல முக்கிய ஆம் ஆத்மி தலைவர்கள், கெஜ்ரிவாலின் சர்வாதிகார தலைமைத்துவ பாணியைக் காரணம் காட்டி கட்சியை விட்டு வெளியேறினர்.

நிர்வாகத்தின் மீது அரசியலில் கட்சி கவனம் செலுத்துவதை விமர்சித்த மூத்த தலைவர் கைலாஷ் கஹ்லோட்டின் ராஜினாமா, கட்சியின் உள் முரண்பாடுகளை மேலும் எடுத்துக்காட்டியது.

10. எதிர்மறை பிரசாரம்

வாக்காளர் மோசடி குற்றச்சாட்டுகள் மற்றும் யமுனா நதியை மாசுபடுத்தியதற்காக பாஜக தலைமையிலான ஹரியானா அரசாங்கத்தைக் குறைகூறுதல் உள்ளிட்ட ஆம் ஆத்மி கட்சியின் எதிர்மறை பிரச்சாரம் வாக்காளர்களை அந்நியப்படுத்தியது.

தேர்தல் செயல்பாட்டில் முறைகேடுகள் மற்றும் தேர்தல் ஆணையத்தின் மீதான தாக்குதல்கள் குறித்த கெஜ்ரிவாலின் கூற்றுக்கள் அதிகாரிகளால் நிராகரிக்கப்பட்டன. இது அவரது நம்பகத்தன்மையை குறைமதிப்பிற்கு உட்படுத்தியது.