அல்-டலிஸைத் தவிர, பல உயர் அதிகாரிகள் கொல்லப்பட்டதாக ஹமாஸ் தெரிவித்துள்ளது.

இவர்களில் உள்துறை அமைச்சகத் தலைவர் மஹ்மூத் அபு வத்ஃபா மற்றும் உள்நாட்டுப் பாதுகாப்பு சேவையின் இயக்குநர் ஜெனரல் பஹ்ஜத் அபு சுல்தான் ஆகியோர் அடங்குவர்.

"ஹமாஸ் எங்கள் பணயக்கைதிகளை விடுவிக்க பலமுறை மறுத்ததைத் தொடர்ந்தும், அமெரிக்க ஜனாதிபதி தூதர் ஸ்டீவ் விட்காஃப் மற்றும் மத்தியஸ்தர்களிடமிருந்து பெற்ற அனைத்து திட்டங்களையும் நிராகரித்ததைத் தொடர்ந்து" செவ்வாய்க்கிழமை காலை இஸ்ரேலிய பிரதமர் பெஞ்சமின் நெதன்யாகு மற்றும் பாதுகாப்பு அமைச்சர் இஸ்ரேல் காட்ஸ் தாக்குதல்களுக்கு உத்தரவிட்டனர்.

அதே நேரத்தில், பாதுகாப்பு காரணங்களுக்காக காசா பகுதியில் உள்ள பள்ளிகளை மூடுவதாக இஸ்ரேல் கூறியுள்ளது.

ஹமாஸ் நடத்தும் சுகாதார அமைச்சகத்தின் சரிபார்க்கப்படாத புள்ளிவிவரங்களின்படி, இதுவரை குழந்தைகள் உட்பட 404 பாலஸ்தீனியர்கள் கொல்லப்பட்டுள்ளனர்.

தாக்குதல்களுக்கு முன்னர், ஹமாஸுடனான போர் நிறுத்த ஒப்பந்தத்தில் மாற்றங்களைக் கோரி, கடந்த இரண்டு வாரங்களாக இஸ்ரேல் அனைத்து உணவு, மருந்து, எரிபொருள் மற்றும் பிற பொருட்களையும் தடுத்து நிறுத்தியது.

இந்த மாத தொடக்கத்தில் இரண்டாம் கட்டம் தொடங்க திட்டமிடப்பட்டிருந்த ஒப்பந்தத்தின் அசல் விதிமுறைகளையே ஹமாஸ் கடைப்பிடிக்க வலியுறுத்தியுள்ளது.

அந்தக் கட்டத்தில், இஸ்ரேல் காசாவிலிருந்து முழுமையாக வெளியேறி, மீதமுள்ள உயிருள்ள பணயக்கைதிகளை விடுவிப்பதற்கு ஈடாக மோதலை நிரந்தரமாக முடிவுக்குக் கொண்டுவருவதற்கான ஒப்பந்தத்தில் கையெழுத்திடும் என்று எதிர்பார்க்கப்பட்டது.

இஸ்ரேல் இந்த ஒப்பந்தத்திற்கு ஒப்புக்கொண்டாலும், ஹமாஸின் ஆட்சி மற்றும் இராணுவத் திறன்கள் அழிக்கப்படும் வரை போர் நிற்காது என்று நெதன்யாகு நீண்ட காலமாகவே கூறி வருகிறார்.