குவாஹாட்டி: அசாமில் நிலக்கரி சுரங்கத்தில் 9 தொழிலாளர்கள் சிக்கிய சம்பவத்தில் எஞ்சிய 5 பேரின் உடல்கள் நேற்று முன்தினம் மீட்கப்பட்டன.

அசாமின் திமா ஹசாவோ மாவட்டத்தில் உள்ள நிலக்கரி சுரங்கம் ஒன்றில் கடந்த ஜனவரி 6-ம் தேதி நிகழ்ந்த விபத்தில் 9 தொழிலாளர்கள் உள்ளே சிக்கிக் கொண்டனர். இவர்களில் ஜனவரி 8-ம் தேதி ஒருவரின் உடலும் 11-ம் தேதி 3 பேரின் உடல்களும் மீட்கப்பட்டன. இதையடுத்து சுரங்கத்தில் இருந்து தண்ணீரை வெளியேற்றும் பணி நடைபெற்றது. இப்பணி நேற்று முன்தினம் முடிவுக்கு வந்து மீட்புப் பணி மீண்டும் தொடங்கியது. இதில் எஞ்சிய 5 பேரின் உடல்களும் மீட்கப்பட்டன.

உடல்கள் சிதைந்த நிலையில் இருப்பதால் அவற்றை அடையாளம் காணும் பணி தொடங்கியுள்ளது. சுரங்க விபத்தில் இறந்த 9 பேரின் குடும்பத்தினருக்கும் மாநில அரசு ரூ.10 லட்சம் இழப்பீடு அறிவித்துள்ளது.