.png)
4 days ago
ARTICLE AD BOX
மாறிவரும் வாழ்க்கை சூழ்நிலையில் நமது உணவு முறையும் மாறி வருகிறது எனக் கூறலாம். தொழில்நுட்ப முன்னேற்றங்களால் நமது உணவும் பல படிநிலைகளில் முன்னேறி உள்ளது. ஆனால் முந்தைய காலகட்டங்களில் நமது உடலுக்கு கிடைத்த சத்தான ஊட்டச்சத்துக்கள் அனைத்தும் உணவு வழியாக கிடைக்கிறதா என்றால் இல்லை என்றே கூறலாம். ஏனென்றால் நாம் தினமும் சாப்பிடும் உணவுகளில் அத்தனை ஊட்டச்சத்துக்கள் இருப்பதில்லை. அதி வேகமான வாழ்க்கையில் என்ன சாப்பிடுகிறோம் என்றே தெரியாமல் சாப்பிட்டு வருகிறோம். எனவே தினமும் சத்தான உணவுகளை எடுத்துக் கொள்ள வேண்டும். நாம் தினமும் காலை வேளையில் சாப்பிடும் உணவு அந்த நாள் முழுவதும் நம்மை ஆற்றலுடன் இயங்குவதற்கு உதவுகிறது.
இந்த வரிசையில் காலையில் நாம் வழக்கமாக சாப்பிடும் சாப்பாட்டில் கூட அதிக சத்துள்ள உணவுகளை சேர்க்கலாம். அதற்கு சிறந்த உதாரணம் நாம் காலையில் சாப்பிடும் இட்லி மற்றும் தோசைக்கு வழக்கமாக சாப்பிடும் சட்னியை விட ஊட்டச்சத்துக்கள் மிகுந்த சட்னியை செய்து சாப்பிடலாம். அதற்கு பல சத்துக்களை கொண்டுள்ள கொள்ளு மற்றும் எள் சிறந்த தேர்வாகும். இந்த இரண்டு சட்னிகளையும் எளிமையாக நாமே வீட்டில் செய்யலாம். இந்த செய்முறையை கீழே கொடுக்கப்பட்டுள்ளது. தெரிந்து கொள்ள முழுமையாக படியுங்கள்.
மேலும் படிக்க | புதினா கொத்தமல்லி சட்னி இருந்தா போதும்! இட்லி மீதம் ஆகாது!
எள் சட்னி
தேவையான பொருட்கள்
கால் கப் வெள்ளை எள்
கால் கப் துருவிய தேங்காய்
ஒரு பல் பூண்டு
சிறிய அளவிலான புளி
5 வற மிளகாய்
கறிவேப்பிலை சிறிதளவு
கால் டீஸ்பூன் கடுகு
கால் டீஸ்பூன் உளுத்தம்பருப்பு
2 டீஸ்பூன் எண்ணெய்
தேவையான அளவு உப்பு
செய்முறை
முதலில் எள்ளை சுத்தம் செய்து எடுத்துக் கொள்ளவும். பின்னர் எண்ணெய் ஊற்றாமல் வெறும் கடாயில் எள்ளை நன்கு வறுத்து வைத்துக் கொள்ளவும். பின்னர் சிறிதளவு எண்ணெயை சூடாக்கி, தேங்காய் துருவல், பூண்டு, புளி, காய்ந்த மிளகாய், கறிவேப்பிலை ஆகியவற்றை வறுத்து, எள்ளுடன் சேர்த்து, உப்பு சேர்த்து, சிறிதளவு தண்ணீர் விட்டு அரைக்கவும். மீதமுள்ள எண்ணெயை சூடாக்கி, கடுகு, உளுத்தம்பருப்பு தாளித்து சட்னியுடன் சேர்க்கவும்.இப்போது சுவையான எள் சட்னி தயார்.
கொள்ளு சட்னி
தேவையான பொருட்கள்
1 கப் கொள்ளு
2 வெங்காயம்
1 தக்காளி
6 பல் பூண்டு
1 டீஸ்பூன் சீரகம்
1 டீஸ்பூன் மல்லிததூள்
3 பச்சை மிளகாய்
சிறிய அளவிலான புளி
சிறிதளவு கறிவேப்பிலை
தேவையான அளவு எண்ணெய்
தேவையான அளவு உப்பு
செய்முறை
முதலில் கொள்ளு, நறுக்கிய தக்காளி இரண்டையும் சேர்த்து வேக வைத்து கொள்ளவும். கடாயில் எண்ணெய் ஊற்றி நறுக்கிய வெங்காயம், சீரகம், தனியா, பச்சை மிளகாய், கறிவேப்பிலை சேர்த்து தாளிக்கவும். வெங்காயம் வதங்கியவுடன் வேகவைத்த கொள்ளு, தக்காளியுடன் பூண்டு சேர்த்து 2 நிமிடம் வதக்கி இறக்கவும். பின்னர் இதனுடன் ஊற வைத்த புளி, உப்பு சேர்த்து மிக்சியில் போட்டு அரைத்து எடுத்து கொத்தமல்லி தழை தூவி பரிமாறவும். சட்னி அரைக்கும் போது கொள்ளு வேக வைத்த நீரை பயன்படுத்தவும். இப்போது சுவையான கொள்ளு சட்னி தயார்.
டாபிக்ஸ்
