28 மாவட்டப் பெண்களுக்கு டிரோன் பயிற்சி!

தமிழ்நாட்டில் 28 மாவட்டங்களைச் சேர்ந்த 44 பெண்களுக்கு டிரோன்கள் மூலமான பயிர்ப் பாதுகாப்புக்குப் பயிற்சி அளிக்கப்பட்டுள்ளது.

கிராமப்புறங்களில் மேற்கொள்ளப்படும் விவசாயத்தில் பெரும்பாலான பணிகளை பெண்களே செய்து வருகின்றனர்.  எனவே. பல்வேறு பண்ணை சார்ந்த பணிகளில் நவீன தொழில் நுட்பங்களை மகளிர் சுய உதவிக் குழு உறுப்பினர்களின் மூலம் செயல்படுத்தி, அதன் வாயிலாக அவர்களின் வாழ்வாதாரம் மேம்படுவதற்கு பல்வேறு நடவடிக்கைகள் மேற்கொள்ளப்பட்டு வருகின்றன. அதன் தொடர்ச்சியாக தற்போது தமிழ்நாடு அரசானது, ஒன்றிய அரசின் பங்களிப்புடன் ஆளில்லா பறக்கும் வாகனம் (Drone) மூலம் பயிர் பாதுகாப்புப் பணிகளை மேற்கொள்ளும் தொழில்நுட்பத்தினை சுய உதவிக் குழு மகளிரிடையே அறிமுகப்படுத்தியுள்ளது.

விவசாயப் பணிகளில் வழக்கமாக பயன்படுத்தும் மருந்து தெளிப்பான்களோடு ஒப்பிடும்போது, டிரோன் மூலம் மருந்தினை தெளிப்பது மருந்தின் பயன்பாட்டுத் திறனை அதிகரிக்கிறது.

தற்போது கிராமப்புறங்களில் வேலையாட்கள் கிடைப்பது குறைந்து வரும் நிலையில், டிரோன் மூலம் குறைந்த நேரத்தில் அதிகமான பரப்பளவில் மருந்து தெளிக்க முடியும். டிரோனைப் பயன்படுத்தி மருந்து தெளிக்கும் போது, வழக்கமாக மருந்து தெளிப்பதற்குப் பயன்படுத்தும் தண்ணீரின் அளவை விட குறைவானதாக இருக்கும். மேலும், வேலையாட்களின் பணிச்சுமை குறைவதோடு, சாகுபடி செலவும் கணிசமாக குறைகிறது. இதனால் விவசாயிகள் அதிக வருவாய் பெற முடியும்.

தமிழ்நாடு மாநில ஊரக வாழ்வாதார இயக்கத்தின் கீழ் செயல்படும் சுய உதவிக் குழுக்களில் இருந்து முதற்கட்டமாக 28 மாவட்டங்களைச் சேர்ந்த 44 பெண்கள் தேர்வு செய்யப்பட்டு, அவர்களுக்கு டிரோன் இயக்குவது குறித்த பயிற்சி அளித்து, டிரோன் இயக்குவதற்கான உரிமத்துடன் டிரோன்களும் வழங்கப்பட்டுள்ளன.

பயிர் சாகுபடி செய்யும் விவசாயிகள், டிரோன் இயக்கும் பயிற்சி பெற்ற சுய உதவிக் குழு மகளிரைத் தொடர்பு கொண்டு, தங்களின் பயிர்களைப் பாதுகாக்க டிரோன் மூலம் மருந்து தெளிக்கும் சேவையைப் பெறலாம்.

தமிழ்நாட்டில் டிரோன் இயக்குவதற்கான பயிற்சி பெற்ற சுய உதவிக் குழு மகளிர் தொடர்பான விபரங்கள் உழவர் கைபேசி செயலியில் தனியார் இயந்திர உரிமையாளர்கள் எனும் பக்கத்தில் பதிவேற்றம் செய்யப்பட்டுள்ளது. இதன் மூலம் உங்கள் மாவட்டத்தில் உள்ள டிரோன் இயக்குவதற்கான பயிற்சி பெற்றுள்ள மகளிர் பற்றிய விபரங்களை தெரிந்து கொள்ளலாம்.