ரயில் கடத்தலுக்குப் பிறகு அடுத்த கொடூரம்: 90 பாக்., ராணுவ வீரர்கள் கொன்று குவிப்பு

பாகிஸ்தானின் உள்ள பலுசிஸ்தானில் பாகிஸ்தான் ராணுவத்தின் வாகனத் தொடரணி மீது மீண்டும் ஒரு பெரிய தாக்குதல் நடந்துள்ளது. பலுசிஸ்தானின் நோஷ்கி மாவட்டத்தில் தற்கொலைத் தாக்குதலில் வாகனத் தொடரணி குறிவைக்கப்பட்டதாகவும், அதைத் தொடர்ந்து கடுமையான துப்பாக்கிச் சூடு நடத்தப்பட்டதாகவும் தகவல்கள் தெரிவிக்கின்றன.

பலுசிஸ்தானில் ரயில்களைக் கடத்திய பிரிவினைவாத ஆயுதக் குழுவான பலுசிஸ்தான் விடுதலைப் படை, இந்தத் தாக்குதலுக்குப் பொறுப்பேற்றுள்ளது. 90 பாகிஸ்தான் வீரர்கள் கொல்லப்பட்டதாக அந்தக் குழு கூறியுள்ளது. இருப்பினும், இதுவரை 7 பேர் கொல்லப்பட்டுள்ளதாகவும், சுமார் 35 பேர் காயமடைந்துள்ளதாகவும் பாகிஸ்தான் ராணுவம் கூறி உள்ளது.

பலூசிஸ்தான் விடுதலை இராணுவ செய்தித் தொடர்பாளர் ஜியான் பலோச் கூறுகையில், ”ஒரு தற்கொலை குண்டுதாரி ஒரு பேருந்தை குறிவைத்து பின்னர் மற்றொரு பேருந்தின் மீது துப்பாக்கிச் சூடு நடத்தினார். அந்த வாகனத் தொடரணியில் எட்டு பேருந்துகள் இருந்தன. அவற்றில் ஒன்று தற்கொலைத் தாக்குதலில் முற்றிலுமாக அழிக்கப்பட்டது. தாக்குதல் நடந்த உடனேயே, பலூசிஸ்தான் விடுதலைப்படையின் ஃபத்தா படையினர் பேருந்தை முற்றிலுமாக சுற்றி வளைத்து, அதில் இருந்த அனைத்து வீரர்களையும் கொன்றனர். இந்த முழு நடவடிக்கையிலும் மொத்தம் 90 பாகிஸ்தான் வீரர்கள் கொல்லப்பட்டனர்” என அவர் கூறினார்.

பாகிஸ்தான் இராணுவப் படைகளின் வாகனத் தொடரணியில் 8 பேருந்துகள் மற்றும் இரண்டு கார்கள் இருந்ததாக கோரசன் டைரி தனது அறிக்கையில் தெரிவித்துள்ளது. ஒரு பேருந்து மீது வாகனத்தில் இருந்து கொண்டு செல்லப்பட்ட ஐஇடி வெடிகுண்டு தாக்குதல் நடத்தப்பட்டதாகவும், இது தற்கொலைத் தாக்குதலாக இருக்கலாம் என்றும், மற்றொரு பேருந்து மீது ராக்கெட் மூலம் இயக்கப்படும் கையெறி குண்டு தாக்குதல் நடத்தப்பட்டதாகவும் ஒரு போலீஸ் அதிகாரி கூறியதாக அது மேற்கோள் காட்டியது. காயமடைந்தவர்கள் நோஷ்கி மருத்துவமனைக்கு கொண்டு செல்லப்பட்டுள்ளனர்.

ஒரு வாரத்திற்குள் பலூச் விடுதலை படையினரால் நடத்தப்படும் இரண்டாவது பெரிய தாக்குதல் இது. செவ்வாய்க்கிழமை முன்னதாக, குவெட்டாவிலிருந்து பெஷாவர் செல்லும் ஜாஃபர் எக்ஸ்பிரஸ் ரயிலை பலூசிஸ்தான் விடுதலை படை கடத்தியது. ரயிலில் 450க்கும் மேற்பட்ட பயணிகள் இருந்தனர். ரயிலைக் கைப்பற்றிய பிறகு, பலூசிஸ்தான் விடுதலை படையினர் ரயிலில் இருந்த முதியவர்கள், பெண்கள் மற்றும் குழந்தைகளை வெளியேற அனுமதித்தது.

புதன்கிழமை இரவு, பாகிஸ்தான் இராணுவம் அனைத்து பணயக்கைதிகளையும் விடுவித்ததாகக் கூறியது. 33 பலூசிஸ்தான் விடுதலை படையினரைக் கொன்றதாகக் கூறியது. ஆனால், அந்தக் குழு பாகிஸ்தான் இராணுவத்தின் தகவல்கள் பொய்யானது என்று நிராகரித்தது. பணயக்கைதிகள் இன்னும் தங்கள் காவலில் இருப்பதாகக் கூறியது.

பின்னர் அந்தக் குழு 214 பிணைக் கைதிகளையும் தூக்கிலிட்டு கொன்றதாகக் கூறியது. அவர்கள் பாகிஸ்தான் ராணுவ வீரர்கள். பாகிஸ்தான் இராணுவம் தனது வீரர்களை இறக்க விட்டுவிட்டதாக பலூசிஸ்தான் விடுதலைப்படை செய்தித் தொடர்பாளர் ஒரு அறிக்கையில் தெரிவித்தார். பாகிஸ்தான் தங்கள் இறுதி எச்சரிக்கையில் எந்த தீவிரத்தையும் காட்டவில்லை என்றும், அதைத் தொடர்ந்து அவர்கள் அனைத்து இராணுவ பணயக்கைதிகளையும் கொன்றதாகவும் அந்தக் குழு கூறியது.