.png)
23 hours ago
ARTICLE AD BOX
தேர்வில் வெற்றிபெற திட்டமிடுதல் என்பது மிக மிக அவசியமான ஒன்று ஆகும். தேர்வுகள் தற்போது நெருங்கி வரும் சூழ்நிலையில் இந்த குறுகிய காலகட்டத்தில் நாம் திட்டமிடுதலோடு படித்தால் நிச்சயமாக நல்ல மதிப்பெண்ணோடு வெற்றியும் பெறலாம். எப்படி திட்டமிடுவது என்ற கேள்வி உங்கள் மனதில் எழலாம். அதற்கான 8 பாய்ண்டுகள் இப்பதிவில்
திட்டத்தை மேம்படுத்துங்கள்
படிப்பதைப் பற்றி யோசிக்கும் முன்பாக, அதற்கான சிறப்பான திட்டமிடலை மேற்கொள்வது முக்கியம். சரியான திட்டமிடல் இல்லையெனில், எதிர்பாராத திடீர் நெருக்கடி ஏற்படுகையில் சமாளிப்பது கடினம். உங்களின் நேரம், உங்களின் சூழல் ஆகியவற்றை கருத்தில் கொண்டு, அதற்கேற்ப திட்டமிடல் வேண்டும். உங்களின் திட்டத்தில், தேவை மற்றும் சூழலுக்கேற்ப மாறுதல்களையும் மேற்கொள்ளலாம்.
அதிக கற்பனை வேண்டாம்
தன்னம்பிக்கை ஒரு மனிதனுக்கு மிகவும் முக்கியம். ஆனால், அதே நேரத்தில், தன்னைப் பற்றிய மிதமிஞ்சிய கற்பனை நிச்சயம் கெடுதலையே தரும். படித்தல் என்பது, அதிக கவனம் தேவைப்படும் ஒரு விஷயம் என்பதால், இதற்கு மூலதனமாக, அதிக ஆற்றலும் தேவை. எனவே, பல மணி நேரங்கள், ஒரே விஷயத்தை எளிதாக படித்துவிட முடியாது.
உங்களுக்கான சரியான நேரம்
எந்த நேரத்தில் படித்தால் நல்லது என்ற வாதம் நீடித்த ஒன்றாக உள்ளது. இதற்கான பதில் என்னவென்றால், யாருக்கு எந்த நேரம் ஒத்துவருமோ அந்த நேரத்தில் படிக்கலாம் என்பதுதான்.
சிலருக்கு காலை வேளையில் படிப்பது பிடிக்கும். சிலருக்கோ, இரவு நேரம்தான் மிகவும் பொருத்தமாக இருக்கும். காலையில் படித்தால்தான் நன்றாக நினைவில் நிற்கும் என்ற கருத்தை பொருட்படுத்த வேண்டியதில்லை. காலை நேரத்தைவிட, இரவு என்பது அமைதியான நேரம் அதை தேர்வு செய்யலாம்.
பொருத்தமான இடம்
சிறப்பாக படிப்பதற்கு, சரியான இடம் என்பதும் முக்கியமான ஒன்று. எனவே, உங்களின் இல்லத்திலோ அல்லது நண்பர் இல்லம் அல்லது வேறு இடங்களிலோ, படிப்பதற்கு பொருத்தமான இடத்தை தேர்வு செய்து கொள்வது உங்களின் பொறுப்பு. எந்த இடம், அமைதியாகவும், தொந்தரவின்றியும், நல்ல காற்றோட்டம் மற்றும் வெளிச்சம் ஆகிய அம்சங்களைக் கொண்டுள்ளதோ, அது படிப்பதற்கு சிறந்த இடம்.
ஒரே பாடம் வேண்டாம்
நீங்கள், ஒரே பாடப் புத்தகத்தை, ஒரே நேரத்தில் முடிக்கவேண்டும் என்ற நோக்கத்தில், தொடர்ந்து படித்துக்கொண்டே இருந்தால், அதில் சலிப்பு ஏற்படலாம். எனவே, ஒரு நாளைக்கு ஒரு பாடப்புத்தகமோ அல்லது சில மணி நேரங்களுக்கு ஒரு பாடப்புத்தகத்தை மாற்றியோ, படிக்கலாம். மேலும், இடைப்பட்ட நேரங்களில் மாதிரி தேர்வுகளையும் எழுதிப்பார்க்கலாம்.
சரியான நுட்பங்களைப் பயன்படுத்தல்
உங்களின் படித்தல் செயல்பாட்டை சிறப்பாக்கும் வகையில். பல நுட்பங்கள் உள்ளன. எனவே, அவற்றில் உங்களுக்குப் பொருத்தமான நுட்பத்தை பின்பற்ற வேண்டும். படிக்கும்போதே, முக்கியமான பாயிண்டுகளை, அடிக்கோடிட்டு, அர்த்தம் தெரியாத வார்த்தைகளுக்கு, புத்தகத்தின் ஓரத்திலேயே அர்த்தம் எழுதி வைத்து படிப்பது ஒரு சிறந்த நுட்பம்.
உங்களின் செயல்பாட்டை மதிப்பிடுதல்
நீங்கள் திட்டமிட்டபடி செயல்பட்டுள்ளீர்களா என்பதை குறிப்பிட்ட நாட்களுக்கு ஒருமுறை மதிப்பிட்டுக் கொள்ள வேண்டும். திட்டமிட்டப்படி, குறிப்பிட்ட பாடங்களை குறிப்பிட்ட நாட்களுக்குள் முடித்து விட்டீர்களா? மாதிரி தேர்வுகளை சிறப்பாகச் செய்துள்ளீர்களா? கடினமான பகுதிகளை சரியாகப் புரிந்துகொண்டீர்களா போன்ற மதிப்பீடுகளை செய்துகொள்வது அவசியம்.
சுய மதிப்பீடு
நீங்கள் சரியாக படித்து தயாராகிவிட்டீர்களா என்பதை சுயமதிப்பீடு செய்து சரிபார்த்துக் கொள்வது அவசியம். மாதிரித் தேர்வுகள் இவற்றில் முக்கியமானவை. இல்லையெனில், பிறரை கேள்விகள் கேட்கவிட்டு, அதற்கு பதில் சொல்லி, படித்ததை தெளிவாக நினைவில் ஏற்றிக்கொள்ளலாம். படிக்கிறேன் என்ற பெயரில், அதிக நேரம் புத்தகமும், கையுமாக அமர்ந்து, தயவுசெய்து பெற்றோரை ஏமாற்ற நினைக்க வேண்டாம். ஏனெனில், உங்களின் தேர்வு மதிப்பெண்கள் நீங்கள், உண்மையிலேயே என்ன செய்தீர்கள் என்பதை தெளிவாகக் கூறிவிடும் என்பதை மறந்துவிட வேண்டாம்.
