தவெக 2-ம் ஆண்டு தொடக்க விழா… இன்று கட்சியில் இணையும் மற்றொரு முக்கிய அரசியல் தலைவர்…?

தமிழக வெற்றிக் கழகம் கட்சியின் இரண்டாம் ஆண்டு தொடக்க விழா கொண்டாட்டம் இன்று பனையூரில் உள்ள கட்சி அலுவலகத்தில் நடைபெற உள்ளது. இதையொட்டி, தவெக கொள்கை தலைவர்களின் சிலைகளை நடிகர் விஜய் இன்று திறந்து வைக்க உள்ளார் .

தமிழக வெற்றிக் கழகம் என்ற கட்சியை நடிகர் விஜய் கடந்த ஆண்டு பிப்ரவரி மாதம் 2-ம் தேதி தொடங்கினார். கட்சி தொடங்கிய அன்றே தேர்தல் ஆணையத்தில் கட்சியின் பெயரை பதிவு செய்தார். இதனைத் தொடர்ந்து தற்போது வரை ஒரு கோடிக்கும் மேற்பட்டோர் தவெகவில் உறுப்பினர்களாக இணைந்துள்ளதாக கூறப்படுகிறது.

கட்சியை அமைப்பு ரீதியாக 120 மாவட்டங்களாக பிரித்து மாவட்ட செயலாளர்கள் நியமிக்கப்பட்டு வருகின்றனர். மேலும், விசிக மற்றும் அதிமுகவில் இருந்து விலகி தவெகவில் இணைந்த ஆதவ் அர்ஜுனா, சிடிஆர்.நிர்மல்குமார் ஆகியோருக்கும் பதவிகள் வழங்கப்பட்டுள்ளன. இந்நிலையில், கட்சி தொடங்கி ஓராண்டு நிறைவடையும் நிலையில், 2-ம் ஆண்டு தொடக்க விழா இன்று கொண்டாடப்படுகிறது. மேலும் தவெக கொள்கை தலைவர்களின் சிலைகளை நடிகர் விஜய் இன்று திறந்து வைக்க உள்ளார். அதேபோல இன்று மாற்றுக் கட்சியில் இருந்து முக்கிய அரசியல் பிரமுகர் ஒருவர் இணைய உள்ளதாக தகவல் வெளியாகியுள்ளது.

கடந்த ஆண்டு அக்டோபர் 27-ம் தேதி தவெக முதல் மாநில மாநாடு விக்கிரவாண்டியில் நடைபெற்றது. மாநாட்டில், அரசியல் மற்றும் கொள்கை எதிரிகள் குறித்து விஜய் பேசியது பெரும் பரபரப்பை ஏற்படுத்தி இருந்தது. இதனை தொடர்ந்து, கட்சியில் நிர்வாகிகள் நியமனம் தீவிரப்படுத்தப்பட்டது என்பது குறிப்பிடத்தக்கது.

The post தவெக 2-ம் ஆண்டு தொடக்க விழா… இன்று கட்சியில் இணையும் மற்றொரு முக்கிய அரசியல் தலைவர்…? appeared first on 1NEWSNATION - Tamil News Online | Latest News in Tamil | Breaking News Tamil | Tamil News Live | தமிழ் நியூஸ் | Tamilnadu News.