இந்த ஆண்டு தொடக்கம் முதலே இந்திய பங்குச் சந்தைகள் தொடர்ந்து சரிவு கண்டு வருகின்றன. பங்குச் சந்தையில் அதிகளவில் பங்குகள் விற்பனை செய்யப்படுகிறது. பங்குகளின் விலை தடாலடியாக குறைந்து வருகிறது. இதனால் முதலீட்டாளர்கள் பெரிய அளவில் இழப்பை சந்தித்து வருகின்றனர். பங்குச் சந்தை சரிவு சில்லரை முதலீட்டாளர்களை மட்டுமல்ல நாட்டின் மெகா கோடீஸ்வரர்களையும் பதம் பார்த்து வருகிறது.

இந்த ஆண்டில் பங்குச் சந்தையின் வீழ்ச்சியால், முகேஷ் அம்பானி, கவுதம் அதானி, அசிம் பிரேம்ஜி உள்ளிட்ட டாப் 7 மெகா கோடீஸ்வரர்கள் சுமார் 70 நாளில் மொத்தம் சுமார் ரூ.2.95 லட்சம் கோடியை (3,400 கோடி டாலர்) இழந்துள்ளனர். இந்த மெகா கோடீஸ்வரர்களின் மொத்த சொத்து மதிப்பு 30,000 கோடி டாலருக்கும் அதிகம் என்பது குறிப்பிடத்தக்கது.

டாப் 7 மெகா கோடீஸ்வரர்களில் பங்குச் சந்தை வீழ்ச்சியால் அதிகம் பாதிக்கப்பட்டது அதானி குழுமத்தின் தலைவர் கவுதம் அதானிதான். இந்த ஆண்டில் அதானியின் சொத்து மதிப்பு 1,010 கோடி டாலர் குறைந்துள்ளது. இதனையடுத்து இவரது சொத்து மதிப்பு 6,880 கோடி டாலராக சரிவடைந்துள்ளது. அதானி குழும நிறுவனங்களில், அதானி எண்டர்பிரைசஸ் பங்கு விலை 12 சதவீதம் சரிந்துள்ளது.

மேலும், அதானி கிரீன் எனர்ஜி பங்கு விலை 22 சதவீதமும், அதானி டோட்டல் கேஸ் பங்கு விலை 21.26 சதவீதமும் குறைந்தது. அதானி எனர்ஜி சொல்யூஷன்ஸ் மற்றும் அதானி போர்ட்ஸ் முறையே 6 மற்றும் 3 சதவீதம் குறைந்தன.

பங்குச் சந்தை சரிவால் இந்த ஆண்டில் ரிலையன்ஸ் இண்டஸ்ட்ரீஸின் தலைவர் முகேஷ் அம்பானி 313 கோடி டாலரை இழந்துள்ளார். இருப்பினும், இந்தியாவின் மெகா கோடீஸ்வரர்கள் பட்டியலில் தொடர்ந்து முதலிடத்தில் உள்ளார். இவருடைய நிகர சொத்து மதிப்பு 8,750 கோடி டாலராக உள்ளது. பங்குச் சந்தையில் ரிலையன்ஸ் இண்டஸ்ட்ரீஸ் பங்கு விலை 2.54 சதவீதம் உயர்ந்துள்ளது. அதேசமயம், ஜியோ பைனான்சியல் சர்வீசஸ் பங்கு விலை 28.7 சதவீதம் வீழ்ச்சி கண்டுள்ளது.

எச்சிஎல் டெக்னாலஜிஸ் நிறுவனத்தின் தலைவர் ஷிவ் நாடாரின் சொத்து மதிப்பு 713 கோடி டாலர் குறைந்துள்ளது. தற்போது இவரின் சொத்து மதிப்பு 3,600 கோடி டாலராக உள்ளது. விப்ரோவின் தலைவர் அசிம் பிரேம்ஜி சொத்து மதிப்பு இந்த ஆண்டில் இதுவரை 270 கோடி டாலர் குறைந்துள்ளது. தற்போதைய நிலவரப்படி இவருடைய நிகர சொத்து மதிப்பு 2,820 கோடி டாலராகும். பொறியியல் மற்றும் கட்டுமான நிறுவனமான ஷபூர்ஜி பல்லோன்ஜி குழுமத்தின் பின்னணியில் உள்ள ஷபூர் மிஸ்திரியின் சொத்து மதிப்பு 453 கோடி டாலர் குறைந்துள்ளது. தற்போது இவரது சொத்து மதிப்பு 3,410 கோடி டாலராக உள்ளது.

ஓபி ஜிண்டால் குழுமத்தின் எமரிட்டஸ் தலைவரான சாவித்ரி ஜிண்டால் 222 கோடி டாலரை இழந்துள்ளார். தற்போது இவரது நிகர சொத்து மதிப்பு 3,010 கோடி டாலராக உள்ளது. சன் பார்மாசூட்டிக்கல் இண்டஸ்ட்ரீஸின் தலைவர் திலீப் ஷாங்வியின் சொத்து மதிப்பு 421 கோடி டாலர் குறைந்துள்ளது. தற்போது இவரது நிகர சொத்து மதிப்பு 2,530 கோடி டாலராக உள்ளது.

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.