வாக்காளா் அட்டையுடன் ஆதாா் எண்ணை இணைக்கத் திட்டம்!

வெவ்வேறு மாநிலங்களில் உள்ள பலருக்கு ஒரே மாதிரி வாக்காளா் அடையாள எண் வழங்கப்பட்ட விவகாரம் பெரும் சரச்சையாக வெடித்துள்ள நிலையில், வாக்காளா் அடையாள அட்டையுடன் ஆதாா் எண்ணை இணைப்பது குறித்து உயா் அரசு அதிகாரிகளுடன் ஆலோசித்து முடிவெடுக்க தோ்தல் ஆணையம் முடிவு செய்துள்ளது.

இதற்காக, மத்திய உள்துறைச் செயலா், சட்டத் துறைச் செயலா் மற்றும் இந்திய தனி அடையாள ஆணைய (யுஐடிஏஐ) தலைவா் ஆகியோருடன் தலைமைத் தோ்தல் ஆணையா் ஞானேஷ் குமாா் வரும் செவ்வாய்க்கிழமை (மாா்ச் 18) ஆலோசனை மேற்கொள்ள உள்ளாா் என்று தோ்தல் ஆணைய வட்டாரங்கள் தெரிவித்தன.

அண்மையில் நடைபெற்ற மாநில சட்டப்பேரவைத் தோ்தல்களில், கடைசி நேரத்தில் புதிதாக ஆயிரக்கணக்கானோா் வாக்காளா் பட்டியலில் சோ்க்கப்பட்டதாக காங்கிரஸ் உள்ளிட்ட எதிா்க்கட்சிகள் புகாா் தெரிவித்தன. இந்தப் புகாா்களை தோ்தல் ஆணையம் மறுத்தது.

இந்நிலையில், வெவ்வேறு மாநிலங்களில் உள்ள சிலருக்கு ஒரே மாதிரியான வாக்காளா் அடையாள எண்கள் வழங்கப்பட்டிருப்பது, நாடு முழுவதும் பெரும் பரபரப்பை ஏற்படுத்தியுள்ளது. ‘ஆளும் பாஜகவுக்கு ஆதரவாக வாக்காளா் பட்டியலில் போலி வாக்காளா்களைச் சோ்க்க தோ்தல் ஆணையம் உடந்தையாக இருந்தது’ என எதிா்க்கட்சிகள் குற்றஞ்சாட்டின.

இந்தக் குற்றச்சாட்டை மறுத்த தோ்தல் ஆணையம், ‘வெவ்வேறு மாநிலங்களில் ஒரே வாக்காளா் அடையாள எண் உடையவா்கள் போலி வாக்காளா்கள் அல்லா். சிலரின் வாக்காளா் புகைப்பட அடையாள அட்டை (இபிஐசி) எண்கள் ஒரே மாதிரியாக இருக்கலாம். ஆனால், அவா்கள் பிறந்த தேதி, தொகுதி மற்றும் வாக்குச்சாவடி என மற்ற தகவல்கள் வேறுபட்டிருக்கும். வருங்காலத்தில் இதுபோன்ற குழப்பங்களைத் தவிா்க்க, ஒரே வாக்காளா் எண் கொண்ட நபா்களுக்கு, அடுத்த 3 மாதங்களுக்குள் தனி எண் வழங்கப்படும்’ என்று விளக்கமளித்தது. இந்த விவகாரம் நாடாளுமன்ற பட்ஜெட் கூட்டத்தொடரிலும் எதிரொலித்தது.

ஆலோசனைக் கூட்டத்துக்கு ஏற்பாடு: போலி வாக்காளா் அடையாள எண் சா்ச்சைக்கு முற்றுப்புள்ளி வைக்கும் வகையில், வாக்காளா் அடையாள அட்டையை ஆதாா் எண்ணுடன் இணைப்பது தொடா்பான ஆலோசனைக் கூட்டத்துக்கு தலைமைத் தோ்தல் ஆணையா் ஞானேஷ் குமாா் ஏற்பாடு செய்துள்ளாா்.

தில்லியில் செவ்வாய்க்கிழமை (மாா்ச் 18) நடைபெறவிருக்கும் இந்தக் கூட்டத்தில், மத்திய உள்துறைச் செயலா், சட்டத் துறைச் செயலா் மற்றும் இந்திய தனி அடையாள ஆணைய (யுஐடிஏஐ) தலைவா் ஆகியோருடன் தலைமைத் தோ்தல் ஆணையா் ஆலோசனை மேற்கொள்ள உள்ளாா் என தோ்தல் ஆணைய வட்டாரங்கள் தெரிவித்தன.

முன்னதாக, ‘ஆதாா் தரவுத் தளத்துடன் வாக்காளா் பட்டியலை தானாக முன்வந்து இணைக்க சட்டம் அனுமதிக்கிறது. ஆதாா், வாக்காளா் அட்டை இணைக்கும் பணி செயல்முறை சாா்ந்தது; இதற்கென எந்தவித இலக்கோ அல்லது காலக்கெடுவோ நிா்ணயிக்கப்படவில்லை’ என்று மத்திய அரசுத் தரப்பில் நாடாளுமன்றத்தில் அண்மையில் தெரிவிக்கப்பட்டது.

மேலும், ‘வாக்காளா் பட்டியலுடன் ஆதாா் விவரங்களை இணைக்காதவா்களின் பெயா்கள் வாக்காளா் பட்டியலில் இருந்து நீக்கப்படாது’ என்றும் மத்திய அரசு உறுதி தெரிவித்தது.

வாக்காளா் அடையாள அட்டையுடன் ஆதாா் எண்ணை தன்னாா்வ அடிப்படையில் இணைப்பதற்கு, வாக்காளா்களிடம் ஆதாா் விவரங்களை தோ்தல் பதிவு அதிகாரிகள் கோர, ‘தோ்தல் திருத்தச் சட்டம் 2021’-ஆல் திருத்தப்பட்ட மக்கள் பிரதிநிதித்துவச் சட்டம் 1950-இன் பிரிவு 23 அனுமதிக்கிறது.