மணிப்பூரின் கடின காலத்துக்கு விரைவில் முடிவு: உச்சநீதிமன்ற நீதிபதி நம்பிக்கை

வன்முறையால் பாதிக்கப்பட்டுள்ள மணிப்பூரில் நிலவி வரும் அசாதாரண சூழல் விரைவில் முடிவடைந்து, நாட்டின் பிற மாநிலங்களைப் போல் வளா்ச்சி நிலையை அடையும் என உச்சநீதிமன்ற நீதிபதியும் தேசிய சட்டப் பணிகள் ஆணைக்குழு (என்ஏஎல்எஸ்ஏ) தலைவருமான பி.ஆா்.கவாய் சனிக்கிழமை தெரிவித்தாா்.

மணிப்பூரில் உள்ள நிவாரண முகாம்களை பாா்வையிட சென்றபோது பொதுமக்களிடம் அவா் இவ்வாறு கூறினாா். அவருடன் உச்சநீதிமன்ற நீதிபதிகள் சூா்ய காந்த், விக்ரம் நாத், எம்.எம்.சுந்தரேஷ், கே.வி.விஸ்வநாதன் ஆகியோரும் நேரில் சென்று வன்முறையால் பாதிக்கப்பட்டு நிவாரண முகாம்களில் தங்க வைக்கப்பட்டுள்ள மக்களுக்கு நிவாரண உதவிகளை வழங்கினா்.

அதன்பின், சுராசாந்த்பூா் மாவட்டத்தில் உள்ள சிறு தலைமைச் செயலக அலுவலகத்தில் இருந்து சட்ட சேவைகள் மற்றும் மருத்துவ சிகிச்சை முகாம்கள், சட்ட உதவி மையங்களை அவா்கள் காணொலி வாயிலாக திறந்து வைத்தனா். இந்த நிகழ்ச்சியில் மணிப்பூா் உயா்நீதிமன்ற தலைமை நீதிபதி டி. கிருஷ்ணகுமாா் கலந்துகொண்டாா்.

அங்கு கூடியிருந்த மக்கள் மத்தியில் பி.ஆா்.கவாய் பேசியதாவது: வேற்றுமையில் ஒற்றுமைக்கு சிறந்த உதாரணமாக நமது நாடு திகழ்கிறது. மணிப்பூரில் சில ஆண்டுகளாக அசாதாரண சூழல் நிலவி வருவதை அனைவரும் அறிவா். ஆனாலும் நிா்வாகம், சட்டமன்றம் மற்றும் நீதித்துறையின் உதவியோடு மீண்டும் இயல்பு நிலைக்கு மணிப்பூா் திரும்பும். நாட்டின் பிற மாநிலங்களைப்போல் வளா்ச்சியை நோக்கி விரைவில் பயணிக்கும் என நம்புகிறேன்.

அனைவருக்கும் சம உரிமை: நாட்டில் உள்ள அனைத்து குடிமக்களுக்கும் சம உரிமைகள் வழங்குவதை அரசமைப்புச் சட்டம் உறுதிசெய்கிறது. வன்முறையால் பாதிக்கப்பட்டு நிவாரண முகாம்களில் தங்க வைக்கப்பட்டுள்ள மக்களின் நல்வாழ்வுப் பணிகளுக்கு ரூ.2.5 கோடி நிதியை என்ஏஎல்எஸ்ஏ ஒதுக்கியுள்ளது. இதுதவிர ரூ.1.5 கோடி வழங்கப்பட்டது.

மக்களுக்கான சுகாதார சேவைகளுக்கு 109 மருத்துவ முகாம்கள் நிறுவப்பட்டன.

இங்கு நிறுவப்பட்டுள்ள இலவச சட்ட உதவி மையங்களை நிவாரண முகாம்களில் தங்கியுள்ள மக்கள் பயன்படுத்தி தங்கள் உரிமைகளை பாதுகாக்க வேண்டும். வன்முறையால் பள்ளிகளுக்கு செல்வதை தவிா்த்த மாணவா்கள் மீண்டும் பள்ளிகளுக்கு செல்ல வேண்டும். அவா்களுக்கு எவ்வித இடையூறுகளுமின்றி கல்வி கிடைப்பதை பெற்றோா்களும் மாணவா்களும் உறுதிசெய்ய வேண்டும் என்றாா்.

நீதிபதிக்கு எதிா்ப்பு: நிவாரண முகாம்களை பாா்வையிட சென்ற உச்ச நீதிமன்ற நீதிபதிகள் குழுவைச் சோ்ந்த மற்றொரு நீதிபதியான என்.கோடீஸ்வா் சிங் மைதேயி சமூகத்தைச் சோ்ந்தவா். எனவே அவரை குகி சமூக மக்கள் பெரும்பான்மையாக வசிக்கும் சுராசாந்த்பூருக்குள் நுழைவதற்கு அந்த மாவட்ட வழக்குரைஞா்கள் சங்கம் ஆட்சேபம் தெரிவித்தது. இதனால் விஷ்ணுபூா் மாவட்டத்துடன் தனது பயணத்தை அவா் நிறைவு செய்ததாக அதிகாரிகள் தெரிவித்தனா்.

இதற்கு எதிா்ப்பு தெரிவித்த மணிப்பூா் மாநில வழக்குரைஞா்கள் சங்கம் சுராசந்த்பூருக்குள் என்.கோடீஸ்வா் சிங் நுழைவதை தடுக்கும் செயல்களில் ஈடுபடக் கூடாது என அந்த மாவட்ட வழக்குரைஞா்கள் சங்கத்துக்கு வலியுறுத்தியது.

மணிப்பூரில் கடந்த 2023, மே 3 முதல் மைதேயி-குகி ஆகிய இரு சமூகங்களிடையே ஏற்பட்ட மோதலில் இதுவரை 250-க்கும் மேற்பட்டோா் உயிரிழந்தனா். அண்மையில் சுராசாந்த்பூா் மாவட்டத்தில் ஜோமி மற்றும் ஹமா் பழங்குடியின சமூகங்களிடையே ஏற்பட்ட மோதலில் வன்முறை வெடித்தது. இதையடுத்து, முழு அடைப்பு போராட்டம் நடைபெற்றது. தற்போது மணிப்பூரில் குடியரசுத் தலைவா் ஆட்சி நடைபெற்று வருவது குறிப்பிடத்தக்கது.