பாகிஸ்தான் ரயில் தாக்குதல்: 182 பணயக்கைதிகள் இருப்பதாகக் கூறும் பிரிவினைவாதிகள்!

தென்மேற்கு பாகிஸ்தானில் ஒரு ரயிலைத் தாக்கிய பின்னர் 35 பயணிகளை தீவிரவாதிகள் பிணைக் கைதிகளாகப் பிடித்துள்ளனர். மேலும், கிட்டத்தட்ட 350 பயணிகள் பாதுகாப்பாக இருப்பதாக உள்ளூர் போலீசார் செவ்வாய்க்கிழமை தெரிவித்தனர். பிரிவினைவாத போராளிக் குழுவான பலூச் விடுதலைப் படை, மொத்தம் 182 பணயக்கைதிகள் இருப்பதாகவும், பாதுகாப்புப் படையினர் அந்தப் பகுதியை விட்டு வெளியேறாவிட்டால் அவர்களைக் கொன்றுவிடுவதாகவும் மிரட்டியதாகக் கூறியுள்ளது.

ஆங்கிலத்தில் படிக்க:

ரயில் ஒரு சுரங்கப்பாதையில் சிக்கிக் கொண்டது, ஓட்டுநர் படுகாயமடைந்தார் என்று உள்ளூர் அதிகாரிகள், காவல்துறை மற்றும் ரயில்வே அதிகாரிகள் தெரிவித்தனர்.

“பெண்கள் மற்றும் குழந்தைகள் உட்பட சுமார் 350 பயணிகள் காப்பாற்றப்பட்டுள்ளனர். மேலும், ரயில் தாக்கப்பட்ட பகுதியை ஒரு நிவாரண ரயில் சென்றடையும்” என்று மாவட்ட மூத்த காவல்துறை அதிகாரி ராணா திலாவர் கூறினார்.

“பாதுகாப்புப் படையினர் ஒரு பெரிய அளவிலான நடவடிக்கையைத் தொடங்கினர்” என்று அவர் கூறினார். ஹெலிகாப்டர்கள் மற்றும் சிறப்புப் படைகள் நிறுத்தப்பட்டுள்ளன.

சுரங்கப்பாதை அருகே வெடிச்சத்தம் கேட்டதாகவும், மலைப்பகுதியில் தீவிரவாதிகளுடன் துப்பாக்கிச் சூடு நடத்தியதாகவும் பாதுகாப்புப் படையினர் தெரிவித்தனர்.

ஆப்கானிஸ்தான் மற்றும் ஈரான் எல்லையில் உள்ள பலுசிஸ்தான் மாகாணத்திற்கு சுதந்திரம் கோரும் பலூச் விடுதலைப் படை, 20 வீரர்களைக் கொன்றதாகவும், ஒரு ட்ரோனை சுட்டு வீழ்த்தியதாகவும் கூறியது. பாகிஸ்தான் அதிகாரிகளிடமிருந்து அதற்கான எந்த உறுதிப்படுத்தலும் இல்லை.

பிணைக் கைதிகளில் பாகிஸ்தான் ராணுவத்தினர் மற்றும் விடுமுறையில் பயணித்த பிற பாதுகாப்பு அதிகாரிகளும் உள்ளதாக அந்தக் குழு தெரிவித்துள்ளது.

“பொதுமக்கள் பயணிகள், குறிப்பாக பெண்கள், குழந்தைகள், முதியவர்கள் மற்றும் பலூச் குடிமக்கள் பாதுகாப்பாக விடுவிக்கப்பட்டு பாதுகாப்பான வழி வழங்கப்பட்டுள்ளது” என்று அது பத்திரிகையாளர்களுக்கு மின்னஞ்சல் அனுப்பி டெலிகிராமில் வெளியிட்ட அறிக்கையில் தெரிவித்துள்ளது.

“ராணுவ தலையீடு தொடர்ந்தால், அனைத்து பணயக்கைதிகளும் தூக்கிலிடப்படுவார்கள் என்று பலுச் விடுதலைப் படை மேலும் எச்சரித்துள்ளது.

பலுசிஸ்தானின் தலைநகர் குவெட்டாவிலிருந்து கைபர் பக்துன்க்வா மாகாணத்தில் உள்ள பெஷாவர் நகருக்குச் சென்று கொண்டிருந்தபோது ஜாஃபர் எக்ஸ்பிரஸ் மீது துப்பாக்கிச் சூடு நடத்தப்பட்டது.

பாகிஸ்தானின் உள்துறை அமைச்சர் மொஹ்சின் நக்வி, இந்தத் தாக்குதலைக் கண்டித்து, "அப்பாவி பயணிகள் மீது துப்பாக்கிச் சூடு நடத்தும் மிருகங்களுக்கு" அரசாங்கம் எந்த சலுகையும் அளிக்காது என்று கூறினார்.

பலுசிஸ்தான் அரசாங்கம் நிலைமையைச் சமாளிக்க அவசர நடவடிக்கைகளை விதித்துள்ளதாக செய்தித் தொடர்பாளர் ஷாஹித் ரிண்ட் மேலும் விவரங்களைக் கூறாமல் தெரிவித்தார்.

பல பத்தாண்டுகளாக பாகிஸ்தான் அரசாங்கத்துடன் போராடும் பல இனக்குழுக்களில் பலுச் விடுதலைப் படை (பி.எல்.ஏ) மிகப்பெரியது. அது பலுசிஸ்தானின் வளமான எரிவாயு மற்றும் கனிம வளங்களை நியாயமற்ற முறையில் பாகிஸ்தான் அரசு சுரண்டுவதாகக் கூறுகிறது.

இந்த மோதலில், அரசாங்கம், இராணுவம் மற்றும் சீன நலன்களுக்கு எதிராக அடிக்கடி தாக்குதல்கள் நடத்தப்படுகின்றன.