பொதுவாக கோடை காலத்தில் சூரிய பகவானின் அனல் கக்கும் கடும் வெப்பம் காரணமாக ஏசி உள்ளிட்ட கூலிங் தயாரிப்புகள் விற்பனை அமோகமாக இருக்கும். இந்த ஆண்டு கோடை காலம் முன்கூட்டியே வரும் என்று எதிர்பார்க்கப்படுகிறது. இந்த கோடை காலத்தில் சராசரியை விட அதிகபமான வெப்பநிலை மற்றும் வெப்ப அலைகள் அதிகரிக்கும் என்று இந்திய வானிலை ஆய்வு மையம் கணித்துள்ளது. அதனை உறுதி செய்வது போல் முழு நாடும் ஏற்கனவே அதிகரித்து வரும் வெப்பநிலையை எதிர்கொள்கிறது.

கோடை காலம் முன்கூட்டியே வருவதால், இந்த ஆண்டு கூலிங் பொருட்களுக்கான தேவை, இதுவரை இல்லாத அளவுக்கு அதிகபட்ச விற்பனைக்கு வழிவகுக்கும் என்று எதிர்பார்க்கப்படுகிறது. அதிக வெப்பநிலை காரணமாக ஏர் கண்டிஷனர்கள்,கூலர்கள் மற்றும் பேன்களுக்கான தேவை அதிகரிக்கும். இது இந்த துறையை சேர்ந்த நிறுவனங்களுக்கு குறிப்பாக, முன்னணி நிறுவனங்களான வோல்டாஸ் மற்றும் ப்ளூ ஸ்டார் ஆகியவை கணிசமாக பயனடையும் என எதிர்பார்க்கப்படுகிறது.

பொதுவாக நுகர்வோர் சாதன பொருட்கள் துறையை சேர்ந்த பங்குகள் ஆண்டுதோறும் கோடைகாலத்துக்கு முன்னதாக தேவையை எதிர்பார்த்து (பங்கு விலையில் ஏற்ற அல்லது இறக்கம்) இயங்கும். கோடை காலம் முன்கூட்டியே தொடங்க உள்ளதால் வோல்டாஸ் மற்றும் ப்ளூ ஸ்டார் பங்குகளின் விலை உயரும் என எதிர்பார்க்கப்படுகிறது.

வோல்டாஸ்: டாடா குழுமத்துக்கு சொந்தமான நிறுவனம் வோல்டாஸ். இந்நிறுவனம் அறை ஏர் கண்டிஷனர், வாட்டர் கூலர்கள் மற்றும் பிற வணிக குளிபதன பொருட்களை சந்தைப்படுத்தும் யூனிட்டரி புராடக்ட்ஸ் (UPBG) உள்பட 3 முக்கிய வணிகப் பிரிவுகளில் செயல்படுகிறது.

கடந்த ஆண்டு வோல்டாஸ் நிறுவனம் இதுவரை இல்லாத அளவுக்கு 20 லட்சம் ஏசிகளை விற்பனை செய்து இருந்தது. மேலும், உள்நாட்டில் இந்த சாதனை விற்பனை அளவை தாண்டிய முதல் நிறுவனம் வோல்டாஸ் என்பது குறிப்பிடத்தக்கது. கடந்த 2023-24ம் நிதியாண்டில் வோல்டாஸ் நிறுவனத்தின் வருவாய் 30 சதவீதம் வளர்ச்சி கண்டு ரூ.12,500 கோடியாக உயர்ந்துள்ளது. மேலும் அந்த நிதியாண்டில் இந்நிறுவனம் லாபமாக ரூ.250 கோடி ஈட்டியுள்ளது.

வோல்டாஸ் நிறுவனம் எதிர்வரும் உக்கிரமான கோடையில் ஏசி உள்ளிட்ட கூலிங் சாதனங்களுக்கான வலுவான தேவை மற்றும் நேர்மறையான நுகர்வோர் உணர்வு இருக்கும் என்று எதிர்பார்க்கிறது. இந்நிறுவனம் சென்னையில் ஒரு புதிய ஆலையை கட்டி வருகிறது. இந்த ஆலை இந்த கோடையில் செயல்பாட்டுக்கு வரும் என்று எதிர்பார்க்கப்படுகிறது.

இதனால் வரும் மாதங்களில் இந்நிறுவனத்தின் செயல்திறன் அதிகரித்து வணிகத்தை அதிகரிக்கும் என எதிர்பார்க்கப்படுகிறது. வோல்டாஸ் பங்கின் விலை தற்போது ஏறுமுகத்தில் உள்ளது. கடந்த ஒரு மாதத்தில் இந்நிறுவன பங்கின் விலை 11 சதவீதம் அதிகரித்துள்ளது. தரகு நிறுவனமான மோதிலால் ஓஸ்வால் நிறுவனம் இப்பங்கின் இலக்கு விலையை 1,640ஆக நிர்ணயம் செய்துள்ளது. கடந்த வர்த்தக தினத்தின் முடிவில் மும்பை பங்குச் சந்தையில் வோல்டாஸ் பங்கின் விலை ரூ.1,400.65ஆக இருந்தது.

ப்ளூ ஸ்டார்: ப்ளூ ஸ்டார் நிறுவனம் இந்தியாவில் 80 ஆண்டு காலமாக செயல்பட்டு வருகிறது. இந்நிறுவனம் ஏர் கண்டிஷனிங் மற்றும் குளிர்சாதன பெட்டிகளை உற்பத்தி செய்கிறது. மேலும் குடியிருப்பு,வணிக,தொழில்துறை மற்றும் உள்கட்டமைப்பு வாடிக்கையாளர்களுக்கு சேவை வழங்குகிறது.

மத்திய கிழக்கு, ஆப்பிரிக்கா உள்பட 18க்கும் மேற்பட்ட நாடுகளில் இத்துறையில் இந்நிறுவனம் முன்னிலையில் உள்ளது. மேலும், வட அமெரிக்கா, அமெரிக்கா மற்றும் ஐரோப்பாவிலும் தனது சந்தையை விரிவுப்படுத்துகிறது. உள்நாட்டில் ஏசி பிரிவில் 14 சதவீத சந்தை பங்களி்ப்பை இந்நிறுவனம் கொண்டுள்ளது.

இந்நிறுவனம் தனது மொத்த ஏசி விற்பனையில் 40 சதவீதம் நுகர்வோர் நிதி திட்டங்கள் மூலம் குறிப்பாக வட்டியில்லாத நிதியுதவி மூலம் நடக்கிறது. ப்ளூ ஸ்டார் நிறுவனம் இந்த கோடை காலத்தில் ஏர் கண்டிஷனர் விற்பனை 25 முதல் 30 வரை வளர்ச்சி காணும் என எதிர்பார்க்கிறது.

பங்குச் சந்தையில் ஏற்ற இறக்கம் நிலவியபோதும், கடந்த பிப்ரவரி முதல் ப்ளூ ஸ்டார் பங்கு விலை 10 சதவீதத்துக்கு மேல் உயர்ந்துள்ளது.கடந்த வர்த்தக தினத்தின் முடிவில் மும்பை பங்குச் சந்தையில் ப்ளூ ஸ்டார் நிறுவன பங்கின் விலை ரூ.2,026.15ஆக இருந்தது.

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.