எச்சரிக்கை! கவனிக்காமல் விட்டால் தசை செயலிழப்பை ஏற்படுத்தும் 'அரிய வகை நோய்'

‘குலியன் பாரே சிண்ட்ரோம்’ என்ற அரிய வகை நோய் தாக்குதல் இந்தியாவில் சில இடங்களில் காணப்படுகிறது. சுருக்கமாக ஜி.பி.எஸ். (GBS) என்று அழைக்கப்படும். நம்முடைய நோய் எதிர்ப்புத் திறனே நமக்கு எதிராகச் செயலாற்றும் ஆட்டோ இம்யூன் குறைபாட்டைச் சேர்ந்தது. இந்த நோயால் எல்லா வயதினரும் பாதிக்கப்படலாம். ஆனால் இந்த நோய் பெண்களை விட பெரியவர்கள் மற்றும் ஆண்களை தான் அதிகம் பாதிக்கிறது.

இந்த நோய் உடலின் நோய் எதிர்ப்பு அமைப்பு, புற நரம்பு மண்டலத்தின் ஒரு பகுதியை தாக்குகிறது. GBSன் முதல் நரம்பியல் அறிகுறி பொதுவாக கால்விரல்களின் பரேஸ்தீசியாஸ் ஆகும். இது தசை இயக்கத்தை கட்டுப்படுத்தும் நரம்புகளையும், வலி, வெப்பநிலை மற்றும் தொடுதல் உணர்வுகள், நரம்புகளையும் பாதிக்கலாம். இந்த செயலிழப்பு சுவாசத்தின் தசைகள் மற்றும் மண்டை நரம்புகளையும் கூட பாதிக்கலாம். சில நோயாளிகளுக்கு வலி 2 ஆண்டுகள் வரை நீடிக்கும் என்று ஆய்வில் தெரிவிக்கப்பட்டுள்ளது.

இது தசை பலவீனம், கால்கள் அல்லது கைகளில் உணர்வு இழப்பு, சுவாச மண்டல சிக்கல்களை ஏற்படுத்தும். சிலருக்கு முகத்தில் உள்ள தசைகள் செயலிழக்க வழிவகுக்கும். ஏறக்குறைய மூன்றில் ஒரு பங்கு மக்களில், மார்பு தசைகள் பாதிக்கப்பட்டு, சுவாசிக்க கடினமான நிலையை ஏற்படுத்தும்.

குலியன் பாரே சிண்ட்ரோம் பொதுவாக கால்கள் மற்றும் கால்களில் கூச்ச உணர்வு மற்றும் பலவீனத்துடன் தொடங்கி கைகள், மார்பு, கழுத்து மற்றும் முகம் போன்ற பகுதிகளுக்கு பரவுகிறது. இந்த நிலை தீவிரமடைந்தால், தசை பலவீனம் பக்கவாதமாக மாறும் நிலை உள்ளது.

குலியன் பாரே நோய் ஜிகா வைரசுடன் தொடர்புடைய ஒரு வகை பாதிப்பு என்று கூறப்படுகிறது. ஆனால், அதன் காரணம் முழுமையாக புரிந்து கொள்ளப்படவில்லை. இது ‘காம்பிலோபாக்டர் ஜெஜூனி’ என்ற பாக்டீரியா தொற்றால் உருவாகும் நிலையில் பாதிக்கப்பட்ட நபருக்கு குமட்டல், வாந்தி, வயிற்றுப்போக்கு ஆகியவற்றை ஏற்படுத்துகிறது. GBSன் பெரும்பாலான நிகழ்வுகள், அவை தொடங்குவதற்கு ஒன்று முதல் மூன்று வாரங்களுக்கு முன்பு மேல் சுவாசக் குழாய் தொற்றுகள் அல்லது வயிற்றுப்போக்கினால் ஏற்படுகின்றன.

இந்த நோயால் பாதிக்கப்பட்ட நபர்கள் தீவிர மருத்துவ கண்காணிப்பில் வைத்து பராமரிக்கப்படுகின்றனர். இது கடுமையான சுவாச பாதிப்பை ஏற்படுத்தும் என்பதால் மூச்சு திணறல் வரும் நிலையில் வென்டிலேட்டரில் வைக்கப்பட்டு பாதிப்பை குறைக்கும் சிகிச்சை வழங்கப்படும்.

GBS-ல் இரண்டு வகையான வலிகளை வகைப்படுத்தலாம். முதல் வகை வலி மிகவும் கடுமையானது, தசை பலவீனம் ஏற்படுவதற்கு முன்பு தொடங்கி மருத்துவமனையில் இருந்து திரும்பும் வரை நீடிக்கும். இது முக்கியமாக நரம்பு சிதைவு, தசை வலி மற்றும் கைகால்களின் வலிமிகுந்த தொடு உணர்வு போன்றவையாகும். இரண்டாவது வகை நாள்பட்ட வலியாக அனுசரிக்கப்படுகிறது - நோயாளிகள் மூட்டுவலி, தசை வலியால் பல ஆண்டுகள் வரை அவதிப்படுவார்கள்.

மகாராஷ்டிராவின் புனே நகரில், இந்த நோயால் இதுவரை 101 பேர் பாதிக்கப்பட்டுள்ளனர். இந்த பாதிப்பு பிற வட மாநிலங்களிலும் காணப்படுகிறது. இந்தநோய் பாதிப்பு காரணமாக இதுவரை 2 பேர் உயிரிழந்துள்ளனர். GBS நோய் தொற்று நேரடியாக ஒருவரிடமிருந்து இன்னொருவருக்கு பரவுவதில்லை என்றாலும், மாசுபட்ட நீரை குடித்ததால் இந்த நோய் தொற்றை ஏற்படுத்தும், பாக்டீரியா, வைரஸ் பரவி இருக்காலம் என்று மருத்துவர்கள் கூறுகின்றனர். வடமாநிலங்களில் பரவும் இந்த நோய் தமிழகத்தில் அதிகமாக இல்லை என்றாலும் விழிப்புணர்வு அவசியம் என்கிறார்கள் மருத்துவர்கள். இந்த நோயின் ஆரம்ப நிலையிலேயே மருத்துவ உதவியை நாடினால் ஒருவாரம் முதல் 10 நாட்களில் குணமடைந்து விடலாம் என்றும் அறிவுறுத்தப்படுகிறது.