இன்று ரஜினி இல்லாமல் தொடங்கும் ‘ஜெயிலர் 2’ படப்பிடிப்பு!

ஜெயிலர் 2 படப்பிடிப்பு இன்று தொடங்கும் என தகவல் வெளியாகியுள்ளது.

கடந்த 2023 ஆம் ஆண்டு சூப்பர் ஸ்டார் ரஜினிகாந்த் நடிப்பில் ஜெயிலர் திரைப்படம் வெளியாகி சூப்பர் டூப்பர் ஹிட் அடித்தது. இந்த படத்தின் வெற்றிக்கு நடிகர் ரஜினியின் மாஸ் ஒரு முக்கிய காரணமாக இருந்தாலும் இயக்குனர் நெல்சனின் திரைக்கதையும் அனிருத்தின் இசையும் மிகப்பெரிய பக்கபலமாக இருந்தது. அந்த வகையில் இப்படம் சுமார் ரூ. 600 கோடிக்கு மேல் வசூல் செய்து வரலாற்று சாதனை படைத்துள்ளது. இந்த வெற்றியை தொடர்ந்து நெல்சன், ரஜினி, அனிருத் கூட்டணியில் ஜெயிலர் 2 திரைப்படம் உருவாக இருக்கிறது. இந்தப் படத்தை சன் பிக்சர்ஸ் நிறுவனம் தயாரிக்கிறது. இது தொடர்பான அதிகாரப்பூர்வ அறிவிப்பை கடந்த சில தினங்களுக்கு முன்னர் படக்குழு ப்ரோமோ வீடியோ ஒன்றை வெளியிட்டு அறிவித்திருந்தது. அதைத் தொடர்ந்து ஜெயிலர் 2 படத்தில் மோகன்லால், சிவராஜ்குமார் ஆகியோர் முக்கிய கதாபாத்திரங்களில் நடிக்கப்போவதாகவும் பிரபல பாலிவுட் நடிகர் ஒருவர் கேமியா ரோலில் நடிப்பதாகவும் சமீப காலமாக தகவல் வெளியாகி வருகிறது. இந்நிலையில் இந்த படத்தின் படப்பிடிப்பு இன்று (மார்ச் 10) சென்னையில் தொடங்க இருப்பதாக தற்போதைய தகவல்கள் தெரிவிக்கின்றன. அதேசமயம் ரஜினி இல்லாமல் இந்த படத்தின் படப்பிடிப்பு தொடங்குவதாகவும் அவரைத் தவிர மற்ற படக்குழுவினர் இந்த படப்பிடிப்பில் பங்கேற்பார்கள் எனவும் சொல்லப்படுகிறது. இது தொடர்பான அறிவிப்பு படக்குழு சார்பில் வெளியிடப்படும் என நம்பப்படுகிறது.