இன்னும் எத்தனை உயிர்களை...?- அண்ணாமலை கேள்வி!

திருநெல்வேலியில் ஓய்வுபெற்ற காவல் அதிகாரி ஜாகிர் உசேன் கொல்லப்பட்ட நிலையில், இன்னும் எத்தனை உயிர்களை பலிகொடுக்கப் போகிறோம் என பா.ஜ.க. மாநிலத் தலைவர் அண்ணாமலை கேள்வி எழுப்பியுள்ளார். 

இதுகுறித்து தன் சமூக ஊடகப் பக்கங்களில் அவர் வெளியிட்டுள்ள குறிப்பில், ” இன்று காலையில் தொழுகை முடித்து வரும் வழியில் வெட்டிக் கொலை செய்யப்பட்டுள்ளார் என்ற செய்தி மிகுந்த அதிர்ச்சி அளிக்கிறது.” என்று குறிப்பிட்டுள்ளார். 

”பணி ஓய்வுக்குப் பிறகு, சமூக நலப் பணிகளில் ஈடுபட்டு வந்த அவர், வக்பு வாரிய நிலங்களை ஆக்கிரமித்தவர்களை எதிர்த்துக் குரல் கொடுத்ததை அடுத்து, அவருக்குக் கொலை மிரட்டல்கள் இருந்து வந்ததாக, சில நாட்களுக்கு முன்பு அவர் பேசிய காணொளி வெளியாகியிருக்கிறது.

ஓய்வுபெற்ற ஒரு காவல் அதிகாரிக்கே கொலை மிரட்டல் விடுத்து, அவரைப் படுகொலை செய்யுமளவுக்குத் தமிழகத்தில் சட்டம் ஒழுங்கு சீர்குலைந்து கிடக்கிறது. சாமானிய மக்களின் புகார்களைக் காவல்துறை கண்டுகொள்வதில்லை.

திமுக அரசை விமர்சிப்பவர்கள் மீது நடவடிக்கை எடுக்க மட்டுமே காவல்துறை பயன்படுத்தப்படுகிறது. இந்த கையாலாகாத திமுக அரசால், இன்னும் எத்தனை உயிர்களைப் பலி கொடுக்கப் போகிறோம்?” என்று அண்ணாமலையின் பதிவில் குறிப்பிடப்பட்டுள்ளது.