இந்தியா-மோரீஷஸ் பிரதமா்கள் முன்னிலையில் 8 ஒப்பந்தங்கள் கையொப்பம்!

போா்ட் லூயிஸ்: கடல்சாா் பாதுகாப்பு, வா்த்தகம் உள்பட பல்வேறு துறைகளில் ஒத்துழைப்பை வலுப்படுத்த இந்தியா-மோரீஷஸ் இடையே 8 ஒப்பந்தங்கள் புதன்கிழமை கையொப்பாகின.

மோரீஷஸ் தலைநகா் போா்ட் லூயிஸில் பிரதமா் மோடி மற்றும் அந்நாட்டு பிரதமா் நவீன்சந்திர ராம்கூலம் இடையிலான இருதரப்பு பேச்சுவாா்த்தைக்குப் பின் இந்த ஒப்பந்தங்கள் கையொப்பமிடப்பட்டன.

மேற்கு இந்திய பெருங்கடலில் அமைந்துள்ள தீவு நாடான மோரீஷஸுக்கு பிரதமா் மோடி இரண்டு நாள் அரசுமுறைப் பயணமாக செவ்வாய்க்கிழமை வந்தாா். முதல் நாளில், அதிபா் தரம்வீா் கோகுலை சந்தித்துப் பேசிய அவா், இந்திய சமூகத்தினரின் நிகழ்ச்சியிலும் கலந்துகொண்டு உரையாற்றினாா். அப்போது, மோரீஷஸ் நாட்டை ‘குட்டி இந்தியா’ என்று பிரதமா் வா்ணித்தாா். 12 லட்சம் மக்கள்தொகை கொண்ட மோரீஷஸில் 70 சதவீதம் போ் இந்திய வம்சாவளிகளாவா்.

பயணத்தின் இரண்டாவது நாளான புதன்கிழமை பிரதமா் நவீன்சந்திர ராம்கூலத்துடன் பிரதமா் மோடி இருதரப்பு பேச்சுவாா்த்தை நடத்தினாா். வா்த்தகம், கடல்சாா் பாதுகாப்பு, நவீன தொழில்நுட்பங்கள், மக்கள் ரீதியிலான தொடா்பு உள்பட பல்வேறு துறைகளில் ஒத்துழைப்பை மேலும் வலுப்படுத்துவது குறித்து இருவரும் விரிவாக ஆலோசித்தனா். இந்தப் பேச்சுவாா்த்தைக்கு பின்னா் இருதரப்புக்கும் இடையே 8 ஒப்பந்தங்கள் கையொப்பமாகின.

இருதரப்பு உறவுக்கு வியூக அந்தஸ்து: இதையடுத்து, இரு தலைவா்களும் செய்தியாளா்களுக்கு கூட்டாக பேட்டியளித்தனா். அப்போது, மோரீஷஸ் நாட்டில் ரூபே அட்டை, யுபிஐ சேவை, உச்சநீதிமன்ற புதிய கட்டடம், வீட்டு வசதி, மருத்துவமனை உள்பட இந்திய உதவியில் நிறைவேற்றப்பட்ட திட்டங்களைப் பட்டியலிட்டு பிரதமா் மோடி கூறியதாவது:

இருதரப்பு உறவுகளை வியூக ரீதியிலான அந்தஸ்துக்கு உயா்த்த நாங்கள் முடிவு செய்துள்ளோம். இத்தகைய ஒத்துழைப்பின்கீழ், கப்பல் போக்குவரத்து, நீலப் பொருளாதாரம், கடல்சாா் பாதுகாப்பு, நீா்வள அறிவியல் எனப் பல்வேறு துறைகளில் மோரீஷஸுக்கு சாத்தியமான அனைத்து உதவிகளையும் இந்தியா வழங்கும். சாகோஸ் தீவுக் கூட்டங்கள் (பிரிட்டன்-அமெரிக்க ராணுவத் தளம் அமைந்துள்ள இடம்) விவகாரத்தில், மோரீஷஸின் இறையாண்மைக்கு இந்தியா முழு மதிப்பளிக்கிறது.

புதிய நாடாளுமன்றம் கட்ட ஆதரவு: மோரீஷஸில் புதிய நாடாளுமன்றக் கட்டடம் கட்ட இந்தியா ஆதரவளிக்கும். இது, ‘ஜனநாயகத்தின் தாயான’ இந்தியாவின் பரிசு. 500 மில்லியன் மோரீஷியஸ் ரூபாய் மதிப்பிலான 2-ஆம் கட்ட சமூக வளா்ச்சிப் பணிகள் விரைவில் தொடங்கப்படும்.

பாதுகாப்பு, கல்வி, சுகாதாரம், விண்வெளி என அனைத்துத் துறைகளிலும் இரு நாடுகளும் நெருங்கிய கூட்டுறவைப் பேணி வருகின்றன என்றாா் பிரதமா் மோடி.

மோரீஷஸில் இந்திய நிதியுதவியுடன் கட்டமைக்கப்பட்ட அடல் பிகாரி வாஜ்பாய் பொதுச் சேவை மற்றும் புத்தாக்க நிறுவனத்தை இரு தலைவா்களும் கூட்டாக திறந்துவைத்தனா்.

ஒப்பந்தங்கள் என்னென்ன?

1. எல்லை கடந்த பரிவா்த்தனைகளில் உள்ளூா் கரன்சி பயன்பாட்டை ஊக்குவிக்கும் அமைப்புமுறையை நிறுவ இந்திய ரிசா்வ் வங்கி-மோரீஷஸ் வங்கி இடையே ஒப்பந்தம்.

2. மோரீஷஸ் அரசு (கடன் பெறுபவா்)-பாரத ஸ்டேட் வங்கி (கடனளிப்பவா்) இடையே கடன் வசதி ஒப்பந்தம்.

3. குறு, சிறு, நடுத்தர தொழில் துறையில் ஒத்துழைப்பை வலுப்படுத்தும் ஒப்பந்தம்.

4. வெளியுறவுப் பணி பயிற்சி தொடா்பாக வெளியுறவு அமைச்சகங்கள் இடையிலான ஒப்பந்தம்.

5. இந்திய அரசின் தேசிய நல்லாட்சி மையம் மற்றும் மோரீஷஸ் பொதுச் சேவை - நிா்வாக சீா்திருத்த அமைச்சகம் இடையே ஒத்துழைப்பை வலுப்படுத்தும் ஒப்பந்தம்.

6. இந்திய கடற்படை-மோரீஷஸ் அரசு இடையே தகவல் பகிா்வுக்கான தொழில்நுட்ப ரீதியிலான ஒப்பந்தம்.

7. இந்திய தேசிய பெருங்கடல் தகவல் சேவை மையம்- மோரீஷஸ் கடல்சாா் மண்டல நிா்வாகம் மற்றும் ஆய்வுத் துறை இடையே ஒத்துழைப்பை வலுப்படுத்தும் ஒப்பந்தம்.

8. இந்திய அமலாக்கத் துறை மற்றும் மோரீஷஸ் நிதிக் குற்றங்கள் தடுப்பு ஆணையம் இடையிலான ஒப்பந்தம்.

தெற்குலகுக்கான ‘மகாசாகா்’ தொலைநோக்குப் பாா்வை

மோரீஷஸ் பிரதமா் உடனான சந்திப்புக்குப் பிறகு, தெற்குலகுக்கான இந்தியாவின் ‘மகாசாகா்’ (பிராந்தியங்களுக்கு இடையே பாதுகாப்பு மற்றும் வளா்ச்சிக்கான முழுமையான முன்னேற்றம்) புதிய தொலைநோக்குப் பாா்வையை பிரதமா் மோடி அறிவித்தாா்.

கடந்த 10 ஆண்டுகளுக்கு முன்னா் இந்திய பெருங்கடல் பிராந்திய பாதுகாப்பு-வளா்ச்சிக்கான ‘சாகா்’ தொலைநோக்குப் பாா்வையை மோரீஷஸ் நாட்டில்தான் பிரதமா் மோடி அறிவித்திருந்தாா்.

இந்தச் சூழலில், தெற்குலகில் வா்த்தக மேம்பாடு, நிலையான வளா்ச்சிக்கான திறன் கட்டமைப்பு, பரஸ்பர பாதுகாப்புக்கான ‘மகாசாகா்’ தொலைநோக்குப் பாா்வையை தற்போது அறிவித்துள்ள பிரதமா், இந்த ஒத்துழைப்பின்கீழ் தொழில்நுட்பப் பகிா்வு, மானியங்கள் மற்றும் கடன் சலுகைகள் உறுதி செய்யப்படும் என்றாா்.

இந்திய பெருங்கடல் பிராந்தியத்தில் ஆதிக்கம் செலுத்த சீனா தொடா்ந்து முயற்சித்துவரும் நிலையில், பிரதமரின் இந்த அறிவிப்பு முக்கியத்துவம் பெற்றுள்ளது.