JFK: அமெரிக்க ஜனாதிபதி ஜான் எஃப். கென்னடி கொலை : கொல்கத்தா, டெல்லியில் CIA ரகசிய தளங்கள் இருந்ததா?

ரஷ்ய ஆதரவு பெற்ற சர்வதேச செய்தி தொலைக்காட்சி நிறுவனமான RT, X இல் பகிர்ந்த இந்த ஆவணத்தில், இந்தியாவின் இரண்டு முக்கிய நகரங்களான புதுடெல்லி மற்றும் கொல்கத்தாவில் ரகசிய தளங்கள் இருந்ததாகக் கூறப்பட்டுள்ளது.

1963 ஆம் ஆண்டு அமெரிக்க ஜனாதிபதி ஜான் எஃப். கென்னடியின் கொலை தொடர்பான புதிதாக வகைப்படுத்தப்படாத ஆவணங்களில் இந்த தளங்கள் கண்டறியப்பட்டுள்ளன என்று தி வீக் செய்தி வெளியிட்டுள்ளது. இந்த ஆவணங்கள் அமெரிக்க தேசிய ஆவணங்கள் மற்றும் பதிவுகள் நிர்வாகம் (NARA) இணையதளத்தில் வெளியிடப்பட்டுள்ளன.

CIA-வின் பல்வேறு ரகசிய நடவடிக்கைகளுக்காக, குறிப்பாக சந்தேக நபர்களை விசாரணை செய்தல் மற்றும் கைது செய்தல் போன்றவற்றுக்காக, "பிளாக் சைட்ஸ்" என அழைக்கப்படும் இந்த ரகசிய வசதிகள் பயன்படுத்தப்படுகின்றன.

டெக்சாஸில் நடந்த இந்த அதிர்ச்சியூட்டும் நிகழ்வு குறித்து அதிக வெளிப்படைத்தன்மையை வழங்க வேண்டும் என்ற அவரது பிரச்சார வாக்குறுதியை நிறைவேற்ற, அமெரிக்க ஜனாதிபதி டொனால்ட் டிரம்ப் செவ்வாய்க்கிழமை இந்த ஆவணங்களை வெளியிட்டார்.

நீதித்துறை வழக்கறிஞர்கள் பல மணி நேரம் ஆவணங்களை ஆய்வு செய்த பின்னர், மொத்தம் 80,000க்கும் மேற்பட்ட ஆவணங்கள் வெளியிடப்பட உள்ளன. இதில் ஆரம்ப கட்டமாக மின்னணு நகல்கள் தேசிய ஆவண காப்பக இணையதளத்தில் வெளியிடப்பட்டுள்ளன.

முன்னர் ரகசியமாக வைக்கப்பட்டிருந்த குறிப்புகளின் PDFகள் உள்ளிட்ட இந்த டிஜிட்டல் ஆவணங்கள், 1962 ஆம் ஆண்டு கியூபா ஏவுகணை நெருக்கடிக்குப் பிறகு சோவியத் யூனியனுடனான அமெரிக்காவின் உறவுகளில் நிலவிய அச்சத்தின் சூழலைக் காட்டுகின்றன.

ஜனவரியில் பதவியேற்ற சிறிது நேரத்திலேயே டிரம்ப் ஆவணங்களை வெளியிடுவதற்கான உத்தரவுக்கு கையெழுத்திட்டார். இதனால், கென்னடி கொலை தொடர்பாக ஆயிரக்கணக்கான புதிய ஆவணங்களை கூட்டாட்சி புலனாய்வுப் பிரிவு கண்டுபிடித்தது.