12 வெற்றிகள்.. தோனியை சமன் செய்த ரோஹித் சர்மா.. தோனி உட்பட எந்த கேப்டனும் செய்யாத உலக சாதனை

ஐசிசி 2025 சாம்பியன்ஸ் டிராபி ஒருநாள் கிரிக்கெட் தொடரின் மாபெரும் இறுதிப்போட்டிக்கு ரோகித் சர்மா தலைமையிலான இந்தியா தகுதிப் பெற்றுள்ளது. பாகிஸ்தானில் நடைபெறும் அந்தத் தொடரில் இந்தியா பாதுகாப்பு பிரச்சனைகளால் தங்களதுப் போட்டிகளை துபாயில் விளையாடுகிறது. அங்கே குரூப் சுற்றில் வங்கதேசம், நடப்புச் சாம்பியன் பாகிஸ்தான், வலுவான நியூசிலாந்து அணிகளை தோற்கடித்த இந்தியா ஹாட்ரிக் வெற்றிகளைப் பெற்றது.

அதனால் குரூப் ஏ பிரிவின் புள்ளிப்பட்டியலில் முதலிடம் பிடித்த இந்தியா மார்ச் 4ஆம் தேதி நடைபெற்ற முதல் செமி ஃபைனலில் பி பிரிவில் இரண்டாவது இடம் பிடித்த ஆஸ்திரேலியாவை எதிர்கொண்டது. அந்தப் போட்டியில் முதலில் விளையாடிய ஆஸ்திரேலியா 265 ரன்களை இலக்காக நிர்ணயம் செய்தது. அதிகபட்சமாக கேப்டன் ஸ்மித் 73 ரன்கள் எடுத்த நிலையில் இந்தியாவுக்கு அதிகபட்சமாக ஷமி 3 விக்கெட்டுகளை வீழ்த்தினார்.

இந்தியா வெற்றி:

அடுத்ததாக விளையாடிய இந்தியாவுக்கு விராட் கோலி 84 ஸ்ரேயாஸ் ஐயர் 45 கேஎல் ராகுல் 42 பாண்டியா 28 ரன்கள் குவித்து 48.1 ஓவரில் வெற்றி பெற வைத்தனர். அதனால் இத்தொடரிலிருந்து ஆஸ்திரேலியாவை வெளியேற்றிய இந்தியா 2023 உலகக்கோப்பை ஃபைனல் தோல்விக்கு பதிலடிக் கொடுத்து ரசிகர்களின் மனதை குளிர்வித்தது. மேலும் ஃபைனலுக்கு முதல் அணியாக இந்தியா தகுதி பெற்று அசத்தியது.

இதையும் சேர்த்து கடைசியாக ஐசிசி தொடர்களில் விளையாடிய 12 போட்டிகளில் ரோஹித் சர்மா தலைமையில் இந்தியா 12 வெற்றிகளை பெற்றுள்ளது. குறிப்பாக 2024 டி20 உலகக் கோப்பையில் 8 வெற்றிகளை தொடர்ச்சியாகப் பெற்ற இந்தியா ரோகித் தலைமையில் கோப்பையை வென்றது. அப்படியே இந்த சாம்பியன்ஸ் டிராபி தொடரில் 4 போட்டிகளில் 4 வெற்றிகளுடன் ஃபைனல் சென்றுள்ளது.

ரோஹித் உலக சாதனை:

இதன் வாயிலாக ஐசிசி தொடர்களில் தொடர்ந்து அதிக வெற்றிகளைப் பெற்ற இந்திய கேப்டன் என்ற எம்எஸ் தோனி சாதனையை ரோகித் சமன் செய்துள்ளார். இதற்கு 2012 – 2014 காலகட்டங்களில் தோனியும் 12 தொடர்ச்சியான வெற்றிகளைப் பெற்றுள்ளார். இது போக 2023 டெஸ்ட் சாம்பியன்ஸ்ஷிப், 2023 உலகக்கோப்பை, 2024 டி20 உலகக் கோப்பை, 2025 சாம்பியன்ஸ் டிராபி தொடர்களில் ரோகித் தலைமையில் இந்தியா ஃபைனலுக்கு தகுதிப் பெற்றுள்ளது.

இதையும் படிங்க: ஜஸ்ட் மிஸ் இதை செஞ்சுருந்தா இந்தியாவை நாக் அவுட் செஞ்சுருப்போம்.. தோல்வி பற்றி ஸ்மித் பேட்டி

இதன் வாயிலாக டெஸ்ட் சாம்பியன்ஷிப், உலகக் கோப்பை, டி20 உலகக் கோப்பை, சாம்பியன்ஸ் டிராபி ஆகிய அனைத்து விதமான ஐசிசி தொடர்களிலும் தனது அணியை ஃபைனலுக்கு அழைத்துச் சென்ற முதல் கேப்டன் என்ற உலக சாதனையையும் ரோஹித் சர்மா படைத்துள்ளார். இதற்கு முன் தோனி உட்பட உலகின் வேறு எந்த கேப்டனும் இந்த தனித்துவ சாதனையைப் படைத்ததில்லை. இந்த சாதனைப் பயணத்தில் ரோகித் மற்றுமொரு கோப்பையை வெல்ல வேண்டும் என்பதே ரசிகர்களின் விருப்பமாகும்.

The post 12 வெற்றிகள்.. தோனியை சமன் செய்த ரோஹித் சர்மா.. தோனி உட்பட எந்த கேப்டனும் செய்யாத உலக சாதனை appeared first on Cric Tamil.